Алматы: Бас имам қала тұрғындарын Құрбан айт мейрамымен құттықтады
Төлеби қажы ОСПАН,
Алматы қаласының Бас имамы
Ардақты ағайын! Қадірлі мұсылман бауырлар!
Қасиетті де ұлық Құрбан айт мейрамымен аман-есен қауыштырған Ұлы Жаратушы Жаббар Иемізге мадақ, мақтаулар болсын! Айтулы мерекені атап өтудің жөн-жосығын үйреткен әз Пайғамбарымызға сансыз салауаттар болғай. Баршаңызды Құрбан айт мерекесімен шын жүректен құттықтаймын!
Бұл мерекеде елдің ынтымақ-бірлігі, ағайын-туыстың татулығы артады. Аллаға шынайы ниетпен құрбандықтар шалынып, мұсылмандар құрбандық еттері мен айттық сыйлықтарымен бір-бірін қуантады. Көрші-қолаңдар көтеріңкі көңіл күймен бір-біріне айтшылап, марқұмдарға Құран бағыштап, берекесі таси түседі.
Алла Тағала Құран Кәрімде: «Раббың үшін намаз оқы және құрбан шал!» деп дүние-мүлкі нисап мөлшеріне жеткен мұсылманға құрбан шалуды міндеттеген. Сондай-ақ, ардақты Пайғамбарымыз (оған Алланың игілігі мен сәлемі болсын): ««Адам баласы құрбан айт күнінде (құрбан шалып) қан ағызудан да сүйікті басқа іспен Алла Тағалаға жақындаған емес» деп сүйіншілеп, құрбан шалудың сауабы мол құлышылық екенін айтқан.
Өкінішке қарай, биыл да елдегі карантинге байланысты Құрбан айтты өз дәрежесінде атап өтіп, жамағатпен құлшылық жасай алмай отырмыз. Атап айтқандай, қала мешіттерінде құрбан айт намазы оқылмайды. Айт намазының орнына әркім өз үйінде 2 ракат нәпіл намаз оқу ұсынылады. Бұл – Алланың аманаты болған өміріміз бен денсаулығымызды сақтау мақсатында жасалып жатқан шаралар. Алайда, қандай жағдайда да сауап іздеген адам үшін жақсылықтың есіктері қашан да ашық екенін ұмытпағанымыз жөн.
Былтырғы тәжірибеге сүйеніп, Бас мүфти бастамасымен карантин талаптарын ескере отырып, халықтың денсаулығын сақтау мақсатында қашықтан құрбан шалу шарасын өткізу үшін муфтият «QURBAN2021.KZ» атты сайтты іске қосты. Барша алматылықтарды құрбандықтарын Алматы орталық мешіті арқылы қашықтан шалуға шақырамын.
Берекеге бастаған құрбан айт мұсылман қауымын имандылыққа ұйытып, барша адамды қанағат пен тәубеге шақыратын мейрам. Осынау айтулы күндерде жүрегіне иман ұялаған әрбір адам жақсы істер жасауға, көмекке мұқтаж жандарға қол ұшын созып, айналасына қуаныш сыйлауға тырысады.
Ұлық мейрамда жасайтын барша ізгілікке толы сауапты амалдарыңыз, қайырымдылық істеріңіз, дұға-тілектеріңізбен шалған құрбандықтарыңыз қабыл болсын!
Алла Тағала жер бетін жұқпалы дерттен тазартып, мерекелі, берекелі сәттерде жүздесуді жазғай!
Айт құтты болсын!
Қызықты тақырыптар
Намаз уақыттары 
