АЛМАТЫ ИМАМДАРЫ ФОРУМҒА ҚАТЫСТЫ (ФОТО)
Бүгін Астана қаласында «Имам – ізгі қоғам жаршысы» тақырыбында ұйымдастырылған V республикалық имамдар форумына алматылық 25 имам қатысты.
Форумға Қазақстан Республикасының Мемлекеттiк кеңесшісі Ерлан Қарин, Ақпарат және қоғамдық даму министрі Дархан Қыдырәлі, Қазақстан мұсылмандары діни басқармасының төрағасы, Бас мүфти Наурызбай қажы Тағанұлы, Ғұламалар, Сарапшылар кеңесінің мүшелері, медресе-колледж бен қарилар орталығының директорлары, сондай-ақ еліміздің әр аймағынан келген 350 имам қатысты. Оның ішінде Алматы қаласының бас имамы Төлеби Дәділұлы бастаған 25 дін қызметкерлері бар.
V республикалық имамдар форумына Мемлекет басшысы Қасым-Жомарт Кемелұлы арнайы құттықтау хатын жолдады. Президенттің құттықтау хатын Қазақстан Республикасының Мемлекеттiк кеңесшісі Ерлан Қарин оқып берді.
Игі іс-шара Қазақстан Республикасының мемлекеттік гимнімен басталып, қасиетті Құран аятымен ашылды. Одан кейін мүфтияттың жыл басынан бері атқарған іс-шаралары туралы бейнеролик көрсетілді.
Форум бағдарламасына сәйкес «Имамның жамағат намазын өткізу тәртібі», «Қазақстан мұсылмандары діни басқармасының рухани (діни және ұлттық) құндылықтарды насихаттаудағы рөлі» және «Қажының рухани келбеті» тұғырнамасы құжаттары қаралып, қабылданды. Басқосу соңында форум Үндеуі жарияланды.
Алматы Орталық мешітінің баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
