Алматы: «Мырзахмет» мешітінде қала көлемінде Наурыз аталып өтті
Өткен аптаның сенбі күні Алматы қаласы имамдары және мешіт жамағаттарының қатысуымен Алатау ауданы «Мырзахмет» мешітінде ұлттық-дәстүрлі сипатта Наурыз мерекесі кең көлемде аталып өтті.
Айтулы шараға ҚМДБ-ның Алматы қаласы бойынша өкіл имамы Еркінбек қари Керімбекұлы, Алматы қаласы Дін істері жөніндегі басқарма басшысы Айдар Есенбеков және Алатау ауданының бас имамы Орынбасар Дәуренбеков қатысып, өздерінің жүрекжарды құттықтауларын жеткізді.
Алғаш сөз алған Айдар Есенбеков мырза Алматы қаласы көлемінде өтіп жатқан шараның маңыздылығына тоқталып, осындай бастамалардың көптеп ұйымдастыру керектігін айтып, жиналған жамағатты Наурыз мерекесімен құттықтады.
Алматы Орталық мешітінің Бас имамы Еркінбек қари Керімбекұлы да қала тұрғындары мен мешіт жамағатын Наурыз мерекесімен құттықтай отырып, дін мен дәстүр сабақтастығы, ұлттық құндылықтар туралы кең мағлұматтар берді.
Сосын шара қонақтары арнайы әзірленген мерекелік дастарханнан дәм татып, наурыз көжеден ауыз тиді.
Көңілді мерекеміз одан әрі әртүрлі спорттық ойындармен жалғасын тапты. Атап айтқанда, мешіт жамағаттары қазақша күрес, қол күрес, шалма салу, қой көтеру, асық ату сынды спорттық сайыс түрлерінен өзара күш сынасты. Сондай-ақ, қала мешіттері жамағаттарынан құралған командалар арасында футболдан жарыс өтті.
Шара соңында жарыс жеңімпаздарына арнайы сыйлықтар табысталып, ерекше көзге түскен азаматтарымыз марапаттарға ие болды.
Алматы қаласы Орталық мешітінің баспасөз қызметі
Қызықты тақырыптар
Намаз уақыттары 
