Алматыда Құранды жатқа оқудан қалалық байқау басталды (ФОТО, ВИДЕО)
Бүгін, ҚР Тәуелсіздігінің 30 жылдығына орай, Қазақстан мұсылмандары діни басқармасы Алматы қаласы өкілдігі және «Салиқалы ұрпақ» қоғамдық қорының ұйымдастыруымен «Гүлжан Төлегенқызы» атындағы Құранды жатқа оқудан ұлдар мен қыздар арасындағы қалалық байқау басталды.
Сайыстың шымылдығы Қуаныш қари Нұрланұлының Құран оқуымен ашылды. Батасын Алматы қаласының бас имамы Еркінбек Шоқай жасады.
Алматы Орталық мешітінің наиб имамы жүргізуші Қасым Ашимов қалалық Құран байқауын салтанатты түрде ашып беру үшін құттықтау сөзді Алматы қаласының бас имамы Еркінбек Шоқай мен "Салиқалы ұрпақ» қоғамдық қорының басшысы Қасым Қасабекке ұсынды.
Бас имам, ең алдымен, ҚМДБ Төрағасы, Бас мүфти Наурызбай қажы Тағанұлының ыстық сәлемін жеткізіп, игі шараның басталуымен құттықтады. Алла Тағаланың кәләмі – Құранды ұлықтауға, Құранның құндылықтарын ел арасында насихаттауға, өскелең ұрпақтың Құран оқуға және жаттауға ынтасы оятуға және қоғам арасындағы имандылық пен бауырмалдылық сынды ізгі қасиеттерді арттыруға арналған қалалық Құран байқауының маңыздылығына тоқталды. Сондай-ақ, қасиетті Құранның ұлықтығын айтып, Құран мен қариларға жағдай жасаған жомарат жандар мен "Салиқалы ұрпақ» қоғамдық қорына алғыс білдірді.
«Салиқалы ұрпақ» қоғамдық қорының басшысы Қасым Қасабек еліміздің ертеңі болған жеткіншектер мен Алланың сөзін көкірегіне қаттаған қариларға ризашылығын білдіріп, барша үміткерге сәттілік тіледі.
Қазылар алқасының төрағасы Ерсін қари Әміре байқау шарттарымен арнайы таныстырды. Қарилар қоржындағы сандармен белгіленген асықтарды алу арқылы Құран оқу кезектерін анықтады.
Сөйтіп, қарилар кезекпен Құран оқып сынға түсуді бастап кетті.
Үміткерлердің Құран оқудағы қағидаларды дұрыс сақтауын жан-жақты қадағалау мақсатында Алматы қалалық «Төле би» мешітінің бас имамы Ерсін Әміре, «Байкен» мешітінің бас имамы Данияр Жұмабаев, «Ақсай» мешітінің бас имамы Бахтияр Қасымалиев, «Салиқалы ұрпақ» қоғамдық қорының қызметкері Айбар Кеңесбек және «Дархан» мешітінің ұстазы Мансур Инаятулла секілді көпшілікке белгілі қарилар байқауға қазылық етуде.
Естеріңізге сала кетсек, қалалық Құран байқауға 86 қари қатысуға өтініш білдірдіріп, 18 мамырдағы Іріктеу сайысында өзара бақ сынаған-ды. Солардың ішінен 40 қари ақтық сайысқа жолдама алды. Атап айтқанда, бүгін толық Құранды жатқа оқу бойынша 15 қари, Құранның 15 парасын жатқа оқу бойынша 15 қари және Құранның 10 парасын жатқа оқу бойынша 10 қари (қыздар) додалы жарысқа түсуде.
Жарыс бір күнге жалғасады. Нәтижесі бүгін ақшам намазынан кейін мәлімделіп, жеңімпаздар қомақты сыйлықтармен марапатталатын болады.
Қариларымыздың баршасына сәттілік тілейміз!
Ескерту! Көрермендер еліміздегі пандемиялық жағдайға байланысты Құран байқауын azan.kz сайтының ютуб каналынан тек қана онлайн тамашалай алады.
Құранды жатқа оқу бойынша қалалық байқаудың сілтемесі: https://youtu.be/k6sDPJZGKv8
Қызықты тақырыптар
Намаз уақыттары 
