Алматыда VIII республикалық Құран жарысы қызу өтуде
Бүгін, ҚМДБ-ның ұйымдастыруымен Құран Кәрімді жатқа және мәнерлеп оқу бойынша VIII республикалық Құран байқауы Алматы қаласы Орталық мешітінде еліміздің 19 өңірінен келген 69 қаридың қатысуымен қызу өтуде.
Бұл додалы жарысқа, негізінен, 19 сәуірге дейінгі Республикалық іріктеу сайыстарында бақ сыныған 558 қаридың ішінен суырылып шыққан хас тарлан қариларымыз Құран оқып жарысуда.
Республикалық байқаудың шымылдығын былтырғы өткен VII республикалық Құран жарысында мәнерлеп оқу номинациясы бойынша І орын жүлдегері атанған Көкшетаулық Тәкен Тұрдақынұлы Құран оқумен ашып берді.
Ең алдымен, ҚМДБ-ның Аппарат басшысы Ғылымбек Мәжиев кіріспе сөз сөйлеп, республикалық көлемде өтіп жатқан Құран байқауының маңыздылығы мен мақсатына тоқталып өтті. Сондай-ақ Құранын ұлықтап жарысқа қатысушы қариларымыз бен төрешілерімізге, көрермен жамағатқа алғысын білдірді.
Алматы Орталық мешітінің наиб имамы Ерсін Әміре жарысқа қатысушыларды байқау шарттарымен таныстырып өтті.
Қарилар қоржындағы сандармен белгіленген асықтарды алу арқылы Құран оқу кезектерін анықтады.
Сөйтіп, бірінші кезекте Алматы облысының қариы Құран оқып бастады. Қазір басқа да өңірдің қарилары да өз кезектерімен Құран оқып сынға түсуде.
Естеріңізге сала кетейік, бүгінгі республикалық байқау Құран Кәрімнің 30 парасын, 20 парасын, 10 парасын және мәнерлеп оқу сынды 4 номинация бойынша өтуде.
Үміткерлердің Құран оқудағы қағидаларды дұрыс сақтауын жан-жақты қадағалайтын Садуахас қари Сағындықұлы, Кәмілжан қари Юлдашұлы, Жұманазар қари Садырханов, Еркінбек қари Керімбекұлы және Ерсін қари Бекайдарұлы секілді еліміздің танымал қарилары әділ бағасын беруде.
Жарыс екі күнге жалғасады. Нәтижесі жексенбіде, яғни 28 сәуір күні сағат 10:00-де Алатау дәстүрлі өнер театрында мәдени шарамен өтетін марапаттау кешінде мәлімделетін болады.
Қариларымыздың баршасына сәттілік тілейміз!
Жарыстың тікелей көрсетілімін Аzan.kz сайтының Youtube арнасынан көре аласыздар.
Жарыстың бірінші күні: https://www.youtube.com/watch?time_continue=2090&v=aFMbWzoH6Gc
Жарыстың екінші күнінің тікелей көрсетілімі 09:00-де басталады. Сілтемесі: https://www.youtube.com/channel/UC7IRI8eIzB9S8WirSZVZweg/live
Қызықты тақырыптар
Намаз уақыттары 
