Ақтөбе: "Зекет" қорының 171-үйі берілді
ҚМДБ-ның Ақтөбе облысы өкілдігінің ұйымдастыруымен қаладағы «Өнер» орталығында «Адамзаттың асыл тәжі» атты Мәуліт кеші өтті.
Мерекелік шараға елордадан арнайы келген ҚМДБ-ның наиб мүфтиі Ершат қажы Оңғаров, ҚМДБ Шариғат және пәтуа бөлімінің меңгерушісі Сансызбай Құрбанұлы, Атырау облысының бас имамы Алтынбек Ұтысхан, Ақтөбе облысының бас имамы Төлеби Оспан, Дін істері басқармасы басшысының орынбасары Сәбит Мұханов қатысты. Көрермендер залын құрметті қонақтар, дін қызметкерлері, жамағат пен жергілікті тұрғындар лық толтырды.
Кеш шымылдығы наиб имам С.Сұңғатов, әнші А.Ғабдуллин және «Ақтөбе» медресе-колледжі шәкірттерінің араб және қазақ тіліндегі Мәуліт жырын оқуымен ашылды. Наиб мүфти Ершат қажы Ағыбайұлы жұртшылыққа Бас мүфти Серікбай қажы Ораздың сәлемін жеткізіп, Тәуелсіздік күнімен құттықтады. Ардақты Пайғамбарымыз (оған Алланың салауаты мен сәлемі болсын) жайлы мәнді де мағыналы насихат айтты. Сондай-ақ, Сансызбай қажы Құрбанұлы Алла елшісінің мейірімділігі мен көркем мінезін сөз етіп, бүгінгі үмметті дара тұлғаның сара жолын ұстануға үндеді.
«Жетім көрсең, жебей жүр» деген сөзді берік ұстанған Жетесовтер отбасы да рухани кешке керемет серпін берді. Олар өздерінің 3 перзентіне қосымша 18 жетім баланы бағып-қағып отыр. 5-еуі – өзге ұлт өкілі. Өмірхан Нариманұлы мен жұбайы Амангүлдің тәрбиелеуіндегі жас жеткіншектерден құралған Жетесовтер фольклорлік «Шашу» ансамблінің орындауындағы Н.Тілендиевтің «Ата толғауы» мен Құрманғазының «Адай» күйін жұртшылық қошеметпен қабыл алды.
«Мұхамедше» термесі мен «Ақиқат нұры» әнін А.Ғабдуллин орындаса, С.Әлібектің орындауындағы «Аллаға мадақ, Пайғамбарға салауат», «Құран хақ» және «Сол күн» атты иләһи әндері кештің шырайын кіргізе түсті.
Ардақты Пайғамбарымыз (оған Алланың салауаты мен сәлемі болсын): «Ең жақсы адам – қоғамға пайдасы тиген адам», – деп сүйіншілегеніндей, Т.Ахтанов атындағы драма театры актерлары қоғамға пайдалы адам болуды суреттейтін А.Әуезханның «Жалғанда жақсылық жасаған жақсы» атты қойылымын сахналады. Сонымен қатар «Әбубәкірдің Пайғамбарға деген сүйіспеншілігі» монологын халық сілтідей ұйып тыңдады.
Мәуліт кешінің қайырымдылығы ретінде кеште «Ел үлесі пәтерге» акциясы аясында және Діни басқарманың 30 жылдығына орай, Гүлсара Хамитова есімді көпбалалы анаға баспана кілті табысталды. Бұл – республика бойынша 171, ал Ақтөбе облысы бойынша 6-баспана.
Сонымен қатар кеш соңында 2019 жылы белсенді қызмет атқарған ақтөбелік бірқатар имамдар Бас мүфти мен наиб мүфти атынан арнайы алғыс хатпен марапатталды.
Ақтөбе облыстық орталық «Нұр Ғасыр» мешітінің баспасөз қызметі
Қызықты тақырыптар
Намаз уақыттары 
