КӨРМЕГЕ ХӘКІМ АБАЙДЫҢ ЕР ТОҚЫМЫ ҚОЙЫЛДЫ
Қазақстан мұсылмандары діни басқармасы Алматы өкілдігінің ұйымдастыруымен 25 қазан Республика күніне орай тұңғыш рет өткізілген «DASTUR FEST» көрмесінде темір ұстасының өнімдері мен ат әбзелдері таныстырылды.
Теміршілік – ата-бабадан бүгінге жеткен киелі өнер. Бұл – Дәуіт пайғамбардан қалған кәсіп. Теміршілікті зерттеген Гумилевтің: «...түріктер әлемдік тарих сахнасында Орталық Азияда алғаш рет темірді өнеркәсіптік жолмен игерген халықтың бірі болған», – деуі бекер емес. Сонау Хұн және Сақ дәуірінен жеткен, Берел қорғанынан табылған алтын адам, мыс айна, гаухар сырғалардың жасалу технологиясы қазіргіден кем еместігі бүгінгі ғалымдарды таңдандырғаны жасырын емес. Жас темірші ұста Жетен Бейбарыс Махмұтұлы да осы ата-бабамыздың жолын жалғап, бүгінде теміршілікпен айналысады.
Ат жалын тартып мінген қазақ ата-бабымыздан ұрпақтан ұрпаққа мирас болып келе жатқан жәдігерлердің бірі - ер тоқымы. Дін мен дәстүр ұлықталған көрмеге Хәкім Абайдың өзі ұстаған ер тоқымы қойылып, көрермен зор ықыласпен тамашалады. Құнды жәдігерді көрмеге ел назарына ұсыну үшін «Daukey» көкпар клубының ұжымы алып келді. Қанмен берілген қасиетпен ат десе делебесі қозған бүгінгі қала қазағы да сәйгүлік көріп селт еткен күн болды. Ортаға ақ боз атпен актер Мадияр Серікбаев шығып, ат әбзелдеріне қатысты таныстырылым өткізді.
Алматы Орталық мешітінің баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
