ОТБАСЫМ АЛТЫН ҚАЗЫНАМ
Ислам шариғатында жанұя әр бір адам өмірінің ең маңызды бөлігі ретінде қарастырылады. Отбасы мүшелерінің әрқайсысының өздерінің ерекше орны бар. Ата бабамыздың «Отан отбасынан басталады» деген мағыналы сөздері әлі күнге дейін өз күштерін жоғалтпаған. Отбасы әлемінде екі жас бақытты болу үшін дана халқымыз ең әуелі қандай қызды алу керектігі немесе қандай ер азаматқа тұрмысқа шығу керектігі туралы мақал мәтелдермен әдемі жеткізген.
Мәселен қыз таңдау кезінде «Шешесін көріп қызын ал, аяғын көріп асын іш» деп жастарға кеңес беріп отырған. Бұл сөзімізге тағы бір дәлел Абай атамыз: « Балаға мінез құлық үш адамнан жұғады деп: ең біріншісі ол баланың ата анасынан, екіншісі ұстазынан ал үшіншісі құрбысынан» деген екен. Яғни жар таңдағанда ең алымен оның ата анасына, ұстазына және де араласатын ортасына мән берген дұрыс. Қазақ халқының бетке ұстар ақындарының бірі Қасым Аманжолов отбасы жайлы «Мен президент, сен премьер» дегені бар. Ақынның бұл сөзінен отбасы ол шағын мемлекет екенін және де сол мемлекеттің басшысы ер кісі екенін түсінуге болады. Бұл турасында қасиетті Құран Кәрімнің «Ниса» сүресінің 34-аятында былай дейді: «Ер кісілер әйелдердің билеушісі» Отбасының амандығы, тыныштығы, ішіп жейтін астары, киетін киімдері тағы басқа қажеттіліктерінің барлығы ер кісінің мойнында. Ал әйелдің міндеті үйдің берекесін кіргізу болып табылады. Құранда келтірілген аяттың сыры да осында жатыр.
Дана халқымыз «Жақсы болса, алғаның есіктегі басыңды төрге сүйрейді. Жаман болса алғаның төрдегі басыңды көрге сүйрейді» деп әйелдің отбасыдағы рөлі үлкен екенін білдіреді. Қазіргі кезде көп жастар алатын жарының сұлулығына, дүниесіне көп мән беретіні өкінішті. Өзінің отбасын бақытты қылғысы келетін азамат жақсы жар таңдауы тиіс. Бұл шаңырақтың жылуы үшін маңызды. Осы орайда ардақты Пайғамбарымыз (оған Алланың сәлемі болсын): «Ер адам әйел затына мына төрт екекшелігіне қарап үйленуі тиіс. Дүние мүлкі, тектілігі, сұлулығы және діндарлығы үшін. Сен бұлардан діндар болғанын таңда» деп өсиет еткен. Бұл мәселеде хакім Абай да құр қалған емес. Яғни Абай атамыз:
Жасаулы деп, малды деп, байдан алма,
Кедей қызы арзан деп, құмарланба.
Ақылы бар, ары бар, ұяты бар,
Ата ананың қызынан ғапыл қалма» – деген екен.
Жалпы, Ислам шариғатында ерлі зайыптылар бір-бірімен жақсы мәміледе болуды насихаттайды. Нағыз махаббат некеге дейін емес некеден кейін болуға тиісті. Алла елшісі (оған Алланың игілігі мен сәлемі болсын): «Сендердің ең жақсыларың әйелдеріңе жақсы қарағандарың» десе, басқа бір хадисте «Әйелдердің ішінде ең жақсысы намысы мен ар ұятын сақтай білген, басқаға көз салмай, тек қана күйеуін жақсы көріп, соған қанағат еткен әйел» деп ерлі-зайыптыларға өсиет еткен. Таразыны тең ұстай білген отбасы мүшелері ылайым татулықта, бірлікте күн кешері хақ. Отбасындағы бірлік – алтын қазына іспеттес. Қойнауы қазынаға толған шаңырақта тәрбиелі үрпақ өсіп-өнері сөзсіз.
Құрметті бауырлар отбасыңыздың берекесі өз қолыңызда. Егер бақытты отбасын қалыптастырғыңыз келсе кез-келген отбасылық мәселені шариғат таразысымен өлшеп алғаныңыз абзал.
Нұрмағамбетов Парахат
Абай Құнанбайұлы мешітінің найб имамы
Жарияланған мақалалар мен шет елдік сайттардан алынған аудармалардың авторлық құқығы Azan.kz сайтына тиесілі.
 Предыдущий |
Следующий |
| Отанды сүю иманнан | «Кәһф» сүресінің 10 құпиясы |
Қызықты тақырыптар
Намаз уақыттары 
