АЛМАТЫ ӘЖЕЛЕРІ ДӘСТҮРДІ ЖАҢҒЫРТТЫ (ФОТО)
Алматы қаласы Медеу ауданы әйел-қыздар секторы ұйымдастыруымен “Дін мен дәстүр” кітабы бойынша әжелер арасында интеллектуалды сайыс өтті. Бұл жарысқа Алматы қаласы “Әжелер мектебінен” 35 әжеден құралған 7 топ қатысты.
Алматы Орталық мешітінің наиб имамы Бекзат Сыздықов алғысөз сөйлеп, сайыс шымылдығын ашты. Жарысқа әділ-қазы алқалары “Нұр-Мүбәрак” университетінің ұстазы, Phd доктор Шәмшат Әділбаева және “Дәстүрге жол” бағдарламасының негізін салушы Аяш Кенжебекқызы мен Сәулеш Нәсіпқалиқызы төрелік етті.
Сайыс 4 кезеңнен тұрды, атап айтар болсақ, 1-ші кезең “сыр сандық” деп аталып, таңдалған ұяшықтар бойынша сұрақтарға жауап берді. 2-ші кезең “Мақал-сөз мәйегі” деп аталып, қатысушылар жасырылған мақал-мәтелдерді тапты. 3-ші кезең “хадис дін тірегі” деп аталып, қатысушы топтар жасырылған кілт сөздер бойынша хадис құрады. 4-ші кезең шарты берілген тақырыпқа сай көрініс қою болды. Атап айтар болсақ, Алатау ауданынан қатысқан “Гауһар ана” құрамасы “сырға салу” көрінісін қойса, Әуезов ауданынан келген “Ақниет” тобы әжелеріміз “құдалық” рәсімдерін егжей-тегжейлі көрсетті. 3-ші топ Алмалы ауданынан келген “Ғибрат” тобы “сәбиге есім қою” салтымен азан шақырып, дін мен дәстүрді байланыстыра отырып көрсетті. 4-ші Бостандық ауданынан келген “Парасат” тобы “Ақиқа” рәсімін көрініспен көрерменге түсінікті етіп діндегі мақсатын жеткізе білді. 5-ші топ Наурызбай ауданынан “Мейірімді ниса” тобы “сәбиді бесікке бөлеу” рәсімін өте жақсы көрсетіп берді. 6-шы Жетісу және Түрксіб ауданынан құралған “Аналар аманаты” тобы “сәбиді қырқынан шығару” рәсімдерін көрсетті. Соңғы топ Медеу ауданынан келген “Зере ана” әжелері “тұсаукесер” рәсімдерін көрсетті.
Әжелер бұл сайыста тек білімдерімен ғана емес, шығармашылықтарымен, өнерлерімен ерекшеленді. Сайыс арасында көрерменге сұрақтар, “Дәстүрлі киім” номинациясы, ән-күй болды, және кітапшалар сыйланды. Сайыс соңында Дүнген халқының да салт-дәстүрлері көрсетілді. Сайысқа қатысқан әжелер 7 түрлі номинация бойынша, Атап айтар болсақ, “Білімі биік аналар” , “Парасат пайымды аналар”, “Өнерімен өнегелі аналар”, “Салиқалы сәнді аналар”, “Данагөй дара аналар”, “Көрікті көркем аналар”, “Жезтаңдай шешен аналар” номинацияларымен марапатталды.
Әр топқа 50 000 теңгелік сертификат пен алғыс хат, гүл шоқтары, “Шипалы аяттар мен дұғалар” кітабы табысталды. Қатысушы әжелерді сайысқа дайындаған ұстаздар да сыйлықтармен марапатталды. Сайыс соңында қазақ халқының дәстүрлі тағамдарынан наурыз көже таратылып, мерекелік дастархан жайылды. Ұлттық мереке Әз-Наурыз тұсындағы дін мен дәстүр жаңғырған сайыс көпшілік көңілінен шықты.
Алматы Орталық мешітінің баспасөз қызметі
Қызықты тақырыптар
Намаз уақыттары 
