Алматы: Бас имам төтенше жағдайға байланысты қабылданған ҚМДБ пәтуасын түсіндірді (ФОТО)
Бүгін Алматы қаласының бас имамы Еркінбек Шоқай қала имамдары мен дін қызметкерлеріне короновирус дертіне қатысты елімізде бір ай көлемінде төтенше жағдай орнауына орай, мешіттерде оқылатын жұма және бес уақыт намазға қатысты ҚМДБ шығарған пәтуасы мен Бас мүфти Наурызбай қажы Тағанұлының мұсылман қауымына жасаған үндеуін түсіндірген жиын өтті.
Бас имам: «Құрметті имамдар! Әлемнің көптеген елін алаңдатып отырған жұқпалы індеттің біздің елімізге жетіп, күн санап артып келе жатқаны бәрімізге белгілі. Осыған орай кеше мемлекеттік деңгейде төтенше жағдай жарияланды. Өз кезегінде, ҚМДБ да жұма және бес уақыт намазға қатысты пәтуа қабылдап, мешіттерде жамағатпен намаз оқуды уақытша тоқтататынын мәлімдеді. Сонымен қатар, Бас мүфти Наурызбай қажы Тағанұлы хазрет елімізді сабыр мен бірлікке, тазалыққа, Алла Тағала аманат етіп берген өмірі мен денсаулығын сақтауға шақырған үндеуін жасады. Сондықтан біз жамағатқа елдегі ахуалды түсіндіріп, «Сақтансаң, сақтармын» дегендей, әрбір адамның денсаулық сақтау ұйымдарының айтқан кеңестері мен шектеулеріне құлақ түруге, жеке бас тазалығын сақтауға, Діни басқарма бекіткен пәтуаға сай амал етуге тиіспіз», – деп пәтуада келген талаптарға жеке-жеке тоқталып өтті.
Біріншіден, мемлекет тарапынан елде төтенше жағдай жариялануына және індеттің таралу қаупі жоғары болуына байланысты мешіттерде жұма намазы уақытша оқылмайды. Әркім өз үйінде жұма намаздың орнына бесін намазын өтейді;
Екіншіден, мешіттер жабылмайды, бес уақыт намазға азан шақырылады, алайда бес уақыт намаз мешітте жамағатпен оқылмайды;
Үшіншіден, мешіт жанындағы асханаларда өтетін құдайы ас, садақалар (жетісі, қырқы, жылы т.б. дәстүрлі кәделер) уақытша тоқтатылады;
Төртіншіден, жаназа намазын тек жақын туыстарымен, яғни аз топпен өткізген дұрыс.
Сонымен қатар, бас имам Алматы қаласы мешіттері мен намазханаларына аптасына бір рет дезинфекциялық жұмыстары жүйелі жүргізілетінін, дін қызметкерлері құлшылық үйінде тазалыққа жіті мән беріп, әрбір мешітте «антисептиктер» болуын, бетперде (маска) тағуын және мешітке намаз оқуға келген жамағатқа құлшылықтарын үйлерінде жасауға кеңес беруін ескертті.
Жиын барысында жамағат тарапынан жиі қойылып жатқан сұрақтар талқыланып, бас имам қала имамдарына пәтуа келген тапсырмаларға сай тиісті тапсырмалар берді.
Алматы Орталық мешітінің баспасөз қызметі
Қызықты тақырыптар
Намаз уақыттары 
