АЛМАТЫ ИМАМДАРЫ «МІРЖАҚЫП. ОЯН, ҚАЗАҚ» КИНОСЫН ТАМАШАЛАДЫ
ҚМДБ Алматы қаласының бас имамы Төлеби Дәділұлы бастаған қала имамдары мен медресе шәкірттері және Орталық мешіт қызметкерлері «Міржақып. Оян қазақ» фильмін тамашалады.
Алашорда үкіметінің белді мүшесі, ХХ ғасырдың басында бойкүйездік басқан халқын отты өлеңімен оятып, өнер-білімге, еркіндікке үндеген Міржақып Дулатұлының өмірін суреттеген көркем фильм жұртшылық назарына шыққан еді. ҚМДБ Бас мүфти Наурызбай қажы Тағанұлы бастаған мүфтият ұжымы алғашқылардың бірі болып тарихы фильмді тамашалауға барған болатын.
«Бір қызығы, «Оян, қазақ» сол кездегі қазақ зиялыларының көңілінен шығып, жалпы қазақ халқына ұнады. Сондай-ақ, дін адамдарының да көңілінен шықты. «Оян, қазақтың» елге ұнағаны соншалықты, кітапты мешіттер, молдалар елге таратты. Осыдан-ақ, бұл кітаптың мән-мағынасын, маңызын байқауға болады. Патша өкіметі кітап авторының соңына түсті. Ол кітапты оқуға тыйым салды» деген тарихшы Мәмбет Қойгелдиев ағамыз айтқандай, бүгінгі күні де маңызын жоймаған кітап негізінде түсірілген отандық әрі тарихи киноны қолдау мақсатында алматылық дін қызметкерлері де кинотеатрдан тамашаладық», - деп атап өтті бас имам Төлеби Оспан. Қала имамдары мен медресе шәкірттері және Орталық мешіт қызметкерлеріне «Міржақып. Оян, қазақ» фильміне 100 билет алып, отандық киноны қолдауға ҚМДБ «Зекет және қайырымдылық қоры» Алматы қаласы бойынша өкілдігі ұйытқы болды.
«Міржақып Дулатұлының қарымды қаламы, көксемсер сөзі, жалынды публицистикасы қазақ журналистикасына, әдебиетіне һәм мәдениетіне мәңгілік өшпес сарын қалдырды. Осындай тарихи фильмдер жалғасын таба берсін деп тілектестік білдіреміз», - деді бас имам.
Алматы Орталық мешітінің баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
