Алматы: «МЕРЕЙЛІ ОТБАСЫ» рухани кездесу өтті
Алматы орталық мешітінде «МЕРЕЙЛІ ОТБАСЫ» атты рухани кездесу өтті. Қазақстан мұсылмандары діни басқармасы қыркүйек айына тақырыптық апталықтар ұйымдастыруды қолға алған болатын. 6-12 қыркүйек арасы «ОТБАСЫ АПТАЛЫҒЫ» болып бекітілген.
Осы апталық аясында өткен шараға Бас имам Төлеби Оспан, қоғам қайраткері Марат Тоқашбаев және Нұр-Мүбарак университетінің ұстазы, PhD докторы Ерғали Алпысбаев қатысты. Марат Байділдәұлы жас-жұбайларға отбасындағы әйел адамның орны, міндеттері жайлы сөз қозғады. Жанұядағы жылылық бірінші әйел кісіге байланысты екеніне кеңінен тоқталып өтті. Ұстаз Ерғали Алпысбаев отбасы құндылығы, ерлі-зайыптылар ара-қатынасында нені басты назарға қою керектігі жайлы сөз етті. Өз кезегінде сөз алған Бас имам Төлеби Дәділұлы: «Қазақстан мұсылмандары діни басқармасының ұйытқы болуымен «Отбасы апталығы» ұйымдастырылып, бүгінде бірнеше іс-шаралар өткізілуде. Соның бірі «Мерейлі отбасы» рухани кездесуінің де басты мақсаты - отбасы құндылықтарын жаңғыртып, атадан балаға мирас боп келе жатқан ұлттық дәстүрімізді жандандыру. Әрбір отбасы өз жылуын сақтап, саналы-салихалы ұрпақ тәрбиелеуі мемлекетіміздің мызғымас тірегі екені айғақ. Сол жолда әрбір жас-жұбайларға отбасыңызға береке, ынтымақ тілеймін. Шаңырақтарыңызда иманды ұл мен ибалы қыз өсе берсін», - деп ақ тілегін білдірді.
Бас имам отбасындағы ер азаматтың өз міндеттерін жетік түсініп, жанұясы үшін қандай қиыншылықтар болмасын мойымай сабырлықпен жеңе білу керектігі жайлы кеңінен тоқталып өтті. Жастарға ақыл-кеңестерін айтып, отбасылық өмірдің құпия-сырларымен бөлісті. Сонымен қатар кездесу барысында алдын-ала өтініш беріп, жаңа өмірге қадам басқалы отырған жұптың неке қию рәсімін өткізді. Неке қасиеті мен ұғымын кеңінен түсіндірген Төлеби қажы Дәділұлы неке куәлігін табыстап, жастарға ақ жол тіледі. Алматы орталық мешіті ұйымдастырған отбасы күніне арналған іс-шара санитарлық ережелерді сақтай отырып жоғары деңгейде өтті. Қала мешіттерінде некесін қидырып шаңырақ көтерген жас-жұбайлар рухани кездесуден келелі әсер алып тарқасты. Жас-жұбайларға отбасы бақытына арналған бірқатар кітаптар сыйға тарту етілді.
Алматы орталық мешітінің баспасөз қызметі
Қызықты тақырыптар
Намаз уақыттары 
