Алматы: Өкіл имам баспасөз мәслихатын өткізді
Бүгін, Алматы қаласы бойынша өкіл имамы Еркінбек қари Керімбекұлы ҚМДБ-ның Алматы қаласындағы ғимаратында қасиетті Рамазан айының қарсаңында баспасөз мәслихатын өткізді.
Бұл алқалы басқосуға Алматы қаласы Орталық мешітінің наиб имамдары Ерсін Әміре ен Ермек Көкірекбаев және бас ұстазы Талғат Сапанов, шариғат мәселелері бойынша Алматы қаласы өкіл имамның кеңесшісі Бауыржан Әлиұлы және жергілікті БАҚ өкілдері қатысты.
Өкіл имам баспасөз маслихатын сөз сөйлеп жүргізіп отырды.
Өкіл имам: «Айлардың сұлтаны Рамазан айы – Алланың адамзатқа тарту еткен ең ұлы нығметтерінің бірі. Бұл айда Хақтың ұлы хабары – Құран түскен. Бұл айда мың айдан да абзал болған Қадір түні бар. Сонымен қатар, бұл айда біздер Алланың бес парызының бірі – Оразаны шын ықыласпен Алланың разылығы үшін тұтып, ауыз бекітеміз. Және бұл ай – сауаптардың еселеніп, тозақ есіктері жабылып, Жәннаттың есіктері айқара ашық тұратын ай. Сондықтан бұл ай – мұсылмандарың ең ұлы мүмкіндік айы десек болады», – деді.
Сосын өкіл имам ҚМДБ-ның төрағасы, Бас мүфти Серікбай қажы Ораз хазреттің Рамазан айына байланысты халыққа жасаған үндеуіне тоқталды. Онда Ғылыми зерттеулер мен шариғи мәтіндерге сүйене отырып, ҚМДБ ғұламалар кеңесі отандық астрономиялық зерттеу нәтижелерін негізге ала отырып Рамазан айының бірінші күнін – 6 мамыр деп бекіткенін айтты. Сондай-ақ, 31 мамырдан 1 маусымға қараған түн – Қадір түні, Айт мерекесі 5-ші маусымға сәйкес келетінін жеткізіп, еліміз бойынша пітір садақасы – 300 теңге құрағанын хабардар етті.
Содан кейін өкіл имам Рамазан айында Алматы қаласы бойынша атқарылатын төмендегі бірқатар іс-шараларды атап өтті.
Ауызашарлар:
Алматы қаласындағы 8 ауданның барлық мешіттерінде кешкі ауызашар дастархандары жайылып, ифтар берілетін болады. Ал, Алматы Орталық мешітінде күнделікті 500 адамға дейін ауызашар дастарханын ұйымдастыру жоспарлануда.
Білім сайыстары:
Алматы Орталық мешітінде күнделікті (дүйсенбі - сенбі күндері аралығында) екінті мен ақшам намаздарының аралығында діни білім алып жүрген жамағатқа арналған «Раббым! Білімімді арттыр!» интеллектуалдық сайысы өткізіліп отырса, Бостандық ауданы мешіттерінде "Рамазанда өзіңізге есеп беріп көріңіз" жарысы ұйымдастырылмақ.
Құран хатымдары:
Алматы қаласындағы 50 мешітте тарауық намаздары өткізілсе, оның 46-сында тарауық намаздарында Құран Кәрім толықтай хатым етіледі.
Қайырымдылық:
Рамазан қайырымдылық айы болғандықтан, қасиетті айда қала мешіттері тарапынан әлеуметтік аз қамтылған отбасыларға қайырымдылық акциялары ұйымдастырылып, қамыққан көңілдерге қуаныш сыйланады.
Сондай-ақ, Жандосов-Шәймерденов, Рысқұлов-Райымбек көшелерінің қиылысында кептелісте тұрып қалған автокөліктегілерге қала мешіттері тарапынан ауызашар пакеттері таратылып, су мен құрмамен ауыз аштыратын болады.
Жол қатынасы:
Мешіттердегі тарауық намаздарының түнгі сағат 24.00-ге дейін жалғасып, кеш аяқталатын болғандықтан, келуші жамағаттың үйлеріне қайту мәселесі ескеріліп, Алматы қаласы әкімінің қолдауымен қала бойынша 4 бағытқа (Саин көшесі, Алматы-1 теміржол бекеті, Талғар трассасы және Достық даңғылы бағыттарында) жүретін бағытты автобустар кестесі ағымдағы жылдың 5 мамыры мен 4 маусым аралығында әр кеште сағат 24:00-ге дейін созылады. Оған қоса «Сұлтан Қорған» мешітінде тегін такси қызмет жолға қойылады.
Қауіпсіздік:
Рамазан бойы Алматы қаласы әкімдігінің қолдауымен әрбір мешіттер мен жамағаттың қауіпсіздіктері ІІО қызметкерлерінің бақылауы күшейтіледі.
Кейінгі кезекте Алматы қаласы Орталық мешітінің наиб имамы Ерсін Әміре сөз алып, Рамазан айының қадір-қасиеті мен дініміздегі орны туралы айтты.
Ал, шариғат мәселелері бойынша Алматы қаласы өкіл имамның кеңесшісі Бауыржан Әлиұлы тілшілер тарапынан қойылған діни сауалдарға тұщымды жауап берді.
Жиын соңында БАҚ өкілдеріне ҚМДБ-ның қолдауымен жарық көрген жаңа кітаптар таныстырылып, сыйға тартылды.
Алла Тағала кіріп келе жатқан Рамазан айымызды құтты да берекелі етсін.
azan.kz
Қызықты тақырыптар
Намаз уақыттары 
