Алматы қаласы өкілдігі 2019 жылдың жұмыс жоспарын бекітті (ФОТО, ВИДЕО)
Бүгін Алматы қаласы Орталық мешітінде бас имамдардың қатысуымен «2019 жылғы Алматы қаласында ислам дінінің дамуы және діни тұрақтылықты сақтау шаралары» атты тақырыпта алқалы отырыс өтті.
Алматы қаласы мешіттерінің 2019 жылғы атқаруға тиісті жұмыстардың жоспарын бекітуге арналған жиналысты Алматы қаласы өкілдігінің Бас имамы Еркінбек қари Керімбекұлы ашып, жүргізіп отырды.
Бас имам: «Бүгінгі бас қосудың мақсаты – Алматы қаласы мешіттерінің 2019 жылы атқаруға тиісті жұмыстардың жоспарын бекіту болып табылады. Күн тәртібінде ағымдағы жылы атқарылатын істердің жоспары талқыланып, тиісті тапсырмалар берілмек. Әрине, бұл жұмыстардың атқарылуы мен қаламыздағы дін ісінің жандануы – ҚМДБ-ның төрағасы, Бас мүфти Серікбай қажы Ораз хазреттің тікелей бастамасымен жүріп жатыр», – деп қала имамдарына жаңа жұмыс жылына сәттілік тіледі.
Содан «әл-Мадина» мешітінің бас имамы Көптілеуов Бақытжан Жетісу ауданы, ал «Заря-восток» мешітінің бас имамы Ахметов Қазыбек Алатау ауданы бойынша атқарылатын іс-шаралардың жылдық жоспарының жобасын баяндады.
Алматы қаласы өкілдігі 2019 жылға арнайы әзірлеген жылдық жоспар мешіттердің бас имамдарына үлестіріліп, осы құжат негізінде Алматы Орталық мешітінің наиб имамы Ермек Көкірекбаев баяндама оқыды. Ол өз баяндамасында 7 тарау, 67 тармақтан тұратын жылдық жоспардың маңызды тұстарына тоқталып, атаулы шараларды атап өтті. Сондай-ақ, Елбасының биылғы жылды «Жастар жылы» деп жариялауына орай, қала мешіттерінің «Жастар ісі» секторына үлкен жүк түсіп тұрғанын айтты.
Атап айтқанда, қала мешіттерінде ай сайын жас жамағаттың ынтымағы мен отансүйгіштік қасиеттерін арттыруға бағытталған қоғамдық-көпшілік сипаттағы іс-шаралар ұйымдастыру; «Жастар жылына» орай Алматы қаласындағы мешітке келуші жастардың Рамазан айынан кейінгі слетін өткізу сынды, т.б. шараларды биыл «Жастар ісі» секторы тарапынан атқаралатын болады.
Жиын соңында Бас имам Алматы қаласы бойынша өткен жылы атқарылған жұмыстарға оң қорытынды жасап, жақында аттестациядан өткен қала имамдарының жоғары нәтиже көрсеткенін тілге тиек етіп, ағымдағы жылы да жақсы көрсеткіштерге жете беруге тілектестік білдірді. Соның ішінде ерекше құлаққағыс ретінде, осы жылдың сәуір айында VIII республикалық Құранды жатқа және мәнерлеп оқудан байқау өтетінін хабарлады.
Алматы Орталық мешітінің баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
