АЛМАТЫ: ҚМДБ ТӨРАҒАСЫ ҚАЙЫРЫМДЫЛЫҚ ШАРАСЫНА ҚАТЫСТЫ (ФОТО+ВИДЕО)
ҚМДБ Төрағасы, Бас мүфти Наурызбай қажы Тағанұлы Алматы орталық мешітінде өткен «Күшіміз – бірлікте» қайырымдылық шарасына қатысты.
Қайырымдылық акция аясында мұқтаж 1000 отбасыға көмек көрсетілді. Әр отбасыға 25 келіден қажетті азық-түлік салынған 25 тонна қорапты имамдар мен еріктілер таратты.
«Қиын сәтте бірлігімізді көрсету үшін жұмылып, қайырымдылық шарасын ұйымдастырып отырмыз. Қазіргі сәтте әрқайсымызға қолдау қажет. Діни басқарманың жұмыс бағытының бірі – қайырымдылық көрсету. Жуырда Мемлекет басшысы Қасым-Жомарт Тоқаевтың бастамасымен «Қазақстан халқына» қоғамдық әлеуметтік қоры құрылды. Дін қызметкерлері де қолдау көрсетуді бастады. Осы ретте сабыр мен тұрақтылық біздің табан тірейтін тұғырымыз болуы тиіс. Бұл қиындық та өтер, кетер. Бірақ біздің сабырымыз, бірлігіміз, берекеміз кетпеуі керек» деген Бас мүфти елді бірлікке шақырды.
Мұқтаж жандарға қайырымдылық қорабын үлестіруге 8 аудандық мешіттер мен демеуші жамағат атсалысты. Карантиндік шектеулерге байланысты әр аудан мешіттері қайырымдылыққа мұқтаж отбасыларының үйіне азық-түлік салынған қораптарды жеткізіп берді. Сонымен қатар қайырымдылық шарасы барысында мешітке тіркелген отбасылар келіп, Бас мүфти қолынан қажетті азық-түлік алды. ҚМДБ Төрағасы мұндай игі істердің жыл бойы жалғасатынын жеткізді.
Алматы Орталық мешітінің баспасөз қызметі
Қызықты тақырыптар
Намаз уақыттары 
