Алматыда тағы бір көп балалы анаға үй кілті табысталды (ФОТО)
Кеше, көптеген игі шаралар мен қайырымдылық істердің басы-қасынан табылып, өзінің қолы ашық жомарттығын дәлелдеп жүрген Жамал апамыз, Алматы қаласы маңынан, көп балалы анаға үйдің кілтін табыстады.
Жамал апамыз Алматы қаласының бас имамы Еркінбек қари Керімбекұлынан Орталық мешіттің тіркеуінде тұрған әлеуметтік аз қамтылған отбасылардың тізімін сұраған екен. Соның ішінен бес баласы бар жалғыз басты анаға кең пейіл апамыздың шарапаты тиіп, үш бөлмелі үй тосын сый ретінде тарту етілді.
Осы ретте өкіл имам сөз алып қасиетті Рамазан – қайырымдылықтың айы екенін, бұл айда біздің көптеп сауапты амалдар жасап қалуға асығуымыз керек екенін айтты. Сондай-ақ, бір отбасыға қуаныш сыйлап отырған Жамал апаға дән ризашылығын білдіріп, жақсы іске мұрындық болғандарға Алладан игілік тіледі.
Мұндай тосын сыйды күтпеген көп балалы ана Алматы қаласы Орталық мешіті жанындағы «Ихлас» қорының кезекті қайырымдылық шарасына келгенін, бірақ маған үй берілетінін білмедім деп көз жасына ерік берді. Жамал апамызға үлкен алғысын білдіріп, жүз жасаңыз деп қолын алды.
Қызықты тақырыптар
Намаз уақыттары 
