Бір адамның шарапаты көпке жетеді
Пәкістандық Рухсана Изхар өз ауылының жүздеген кедей тұрғындарын күнделікті тегін тамақтандырады. Оның бұл әрекеті тамаша үлгіге айналып, жас пәкістандықтарды мұқтаж жандарды азықпен қамтамасыз етуді мақсат еткен «Ризық» әлеуметтік жобасын құруға итермеледі.
«Ризық» 2015 жылы сәуірде достардың бастамасымен құрылған, солардың бірі – Изхардың ұлы, Хузайфа Ахмад. «Ризық» Лахордағы кедей аудандарды анықтап, оларды картаға түсіреді. Кедейліктегі адамдарға көмек осылай басталады.
Facebook-тегі ресми парақшасында олардың қызметі келесідей сипатталады: «Соңғы жиырма жыл көлемінде күн сайын талтүсте Хузайфаның анасы үйінің есіктерін айқара ашып, барлық ашыққан жандарды түскі асқа шақыратын. Көп ұзамай үйдің іші тамақ алуға қауқары жоқ адамдарға толып кететін. Келген әрбір адамның отбасы болатын, олардың әрқайсысына өзі және отбасы мүшелерінен артық тағам алмаулары сұралатын еді, себебі ешкімнің аш қалмауы керек-ті».
Рухсана ұлы мен оның достарын әрі қарай жүріп, көбірек адамға көмектесуге қанаттандырды. «Хузайфаның анасы мен соған ұқсас жандардың күш салуына қарамастан, аштық пен кедейлік пәкістандық қоғамда кең етек жайған. Хузайфа бақуатты отбасында дүниеге келді, дегенмен ол бала кезінен осы мәселеге алаңдаған. Ол пәкістандық қоғамдағы аштыққа қарамастан, көптеген бай адамдардың тағамдарды лақтыратынын көрген, осы алшақтықты жою үшін бір әрекетке бару керек болатын. Мұса мен Қасым экономика саласының мамандары ретінде тәжірибелік зерттеулері барысында дәл осы көрініске тап болған. Ақыр соңында үш дос бас қосып, «Ризық» жобасының негізін қалады.
«Ризық» - азық-түлікті қалпына келтіру және үлестіру бойынша Пәкістандағы алғашқы қызмет. Жоба үш достың өз көліктерімен қаланы аралап, азық-түлікті жинауы мен таратуынан басталды. Ал бүгінде ол Пәкістанның ең ірі қалаларының бірі – Лахорда жұмыс істейтін дамушы ұйым. Университет қабырғасында алған білімдері мен отбасында қалыптасқан құндылықтарының арқасында бұл үш жас жігіт тек Лахорда ғана емес, бүкіл Пәкістандағы қалдықтар мен аштық мәселесін жоюды көздейді.
«Ризық» күніне 200-ден 250 табақ асқа дейін таратады, алайда жоба командасы аталған санды 2000-ға жеткізуді мақсат етеді.
Кейде бір адамның адал ниеті мен қызметі көптеген адамның сенімін өзгерте алады.
Тақырып бойынша жаңалықтар
Қызықты тақырыптар
Намаз уақыттары 
