КАРАНТИН. ТОЙ-ТОМАЛАҚ. ЖҰМА НАМАЗЫ...
Адам кейде өзін есігі жоқ үйде жүргендей сезінеді. Шыққысы келеді, бірақ, шығайын десе есікті таба алмайды. Біздің қазіргі карантин кезіндегі жағдайымыз да дәл сондай. Мысалы, сыртқа шыққысы келген көбелек терезенің аппақ әйнегін көрмей, терезеге қайта-қайта соғылып құлайды. Сыртқа шығамын деген талпыныспен ол қанша соғылып құласа да осы әрекетін қайталаудан танбайды. Терезенің жоғарғы жағындағы бір бөлігін жартылай ашып қойсаңыз, көбелек бәрібір сол тұрған жерінде терезе әйнегіне соғылып тұра береді. Егер сол көбелек кішкене артқа қарай ұшып, терезеге толықтай қарайтын болса, ол ашық тұрған терезенің бөлігін көретін еді. Бірақ, сырттағы әдемі табиғатқа тезірек шығуды қалаған көбелек артқа қарай ұшпай, терезе әйнегіне соғылып тұра береді.
Біз де карантин жағдайынан шыққымыз келеді. Қалыпты өмірге тезірек оралғымыз келеді. Алайда, қарапайым сақтық шараларына мән бермей келеміз. Мысалы, елдің денсаулығын сақтап, індеттің таралуын болдырмас үшін мешіттерде парыз болған жұма намазын тоқтатуға мәжбүр болудамыз.
Алайда, халық той-томалақ пен құдайы астарды өткізуді тоқтатпай отыр. Сіз, той-жиындар мен құдайы астарды өткізу арқылы қоғамның қалыпты өмірге оралуына шектеу жасап жатқаныңызды жақсы біліңіз. Сіз, көпшіліктің қатысуымен іс-шараларды өткізу арқылы мұсылман жамағатын Алланың парыз еткен намаздарын өтеуіне тоқтау салып жатқаныңызды жақсы біліңіз. Пайғамбарымыздың (с.ғ.с.) хадисінде:
«Мұсылмандар бір-біріне бауырмалдықта, мейірімділікте, қарым-қатынаста бір бүтін дене іспеттес. Егер оның бір ағзасы ауырса, қалғаны ұйқысыз және ыстығы көтерілуінде онымен бірге болады», – деген.
Демек, мұсылман жамағаты карантин режимін сақтап, індет таралмас үшін ұлы ғибадаттарды орындай алмай жатқанда басқалардың той тойлап, көпшіліктің қатысуымен өтетін шараларды өткізіп жатқаны қалай болмақ? Бір сәт ойланып, мәселеге осы қырынан қарап көріңізші.
Пайғамбарымыздың (с.ғ.с.) басқа бір хадисінде:
«Мүмін адам бір іннен екі рет шақтырмайды», – делінген.
Яғни, бұл хадис – мұсылман баласы бір қателікті екінші рет қайталамайды дегенді меңзеп тұр. Өткен жылы індет өршігенде көптеген жақындарымыздан және көрнекті тұлғаларымыздан айырылып қалдық. Әрине, оның басты себептерінің бірі – санитарлық талаптарға бей-жай қарау. Сол себепті, биыл да осындай жағдайларды туындатпас үшін барынша сақтық шараларын қолға алуға баршаңызды шақырамыз.
Алла Тағала індеттен ертерек арылтып, емін-еркін құлшылықтарымызды орындап, әр түрлі іс-шараларымызды өткізетін қалыпты өмірімізге оралуды баршамызға нәсіп етсін. Ауырып жатқандардың дертіне шипа беріп, ауырмаған жандарға ауырмаудың жолын табуды бұйыртсын деп тілейміз.
ТӨЛЕБИ ҚАЖЫ ОСПАН,
Алматы қаласының бас имамы
Қызықты тақырыптар
Намаз уақыттары 
