Бас имам: Қасиетті құрбан айт құтты болсын!
Алматы қаласы Орталық мешітінің
бас имамы Еркінбек қари Шоқай
Құрметті қала тұрғындары!
Баршамызды айтқа аман-есен жеткізген Алла Тағалаға сансыз шүкірлер мен мақтаулар болсын!
Баршаңызды күллі мұсылман қауымы асыға күткен қасиетті, ұлық мереке – Құрбан айт мейрамымен құттықтаймын!
Мұсылмандар үшін ерекше қасиетке ие екі айт мейрамы бар: бірі – ораза айты болса, екіншісі – Құрбан айт. Осы екі мейрамды әлем мұсылмандары, соның ішінде халқымыз ғасырлар бойы атап өтіп келеді. Мақсат – Алла Тағаланың бұйырғандарын орындау арқылы, оның разылығына бөлену мен мол сауапқа кенелу. Сонымен қатар, бұл қоғамдық-әлеуметтік тұрақтылықты сақтау күшіне ие, күштіні әлсізге, байды кедейге қарасуға үндейтін, бауырмалдық пен бірлікке, қонақжай болуға шақыратын ерекше төл мерекеміз.
Құрбан айт мерекесі, асыл дініміздің негіздерінің бірі, яғни құрбандық шалуға мүмкіндігі бар мұсылмандардың Құдай алдындағы міндеті болып табылады. Бұған қатысты Алла Тағала Қасиетті Құранның «Кәусар» сүресінің 2-аятында: «Сондықтан Раббың үшін айт намазын оқы және құрбан шал» деп бұйырса, ал тағы бір аятта: «Біз әрбір үммет үшін, өздеріне берген малдардан, Алланың ғана атын атап, құрбан шалуды бекіттік. Өйткені, Тәңірлерің бір-ақ Тәңір. Сондықтан Соған ғана бой ұсыныңдар. (Мұхаммед!) Ықыластыларды қуандыр» (Хаж сүресі, 34-аят), – деп Алла Тағаланың разылығын тілеп, ықыласпен құрбандық шалушыларды сүйіншілейді. Және де бұл мерекеде қоғамдық қарым-қатынастар біршама реттеліп, адамдардың бір-біріне деген мейір-махаббаты қайта оянғандай болады. Өйткені, бұл күндері алыстағы туған-туыстар бір-біріне айттап келеді, көрші-қолаңдар бір-біріне көңіл бөле бастайды, жағдайы төмен отбасыларға жан-жақты көмектер көрсетіліп, құрбан еттерінің бір бөлігі үлестіріледі. Балалар да шат-шадыман көңіл-күйге бөленіп, мерекенің қасиеті мен шарапатын сезе бастайды. Жалпы айтқанда, мұсылмандарды бірлікке үндейтін, бір-бірінің көңілін сұрап, әрқашан көмек қолын созуға әзір тұратын етіп тәрбиелеуге осындай Құрбан айт сынды мерекелердің маңызы өте зор.
Алла Тағала шалған құрбандықтарымыз бен игі амалдарымызды қабыл еткей! Еліміз аман, жұртымыз тыныш болсын! Осындай Алланың разылығына жетелейтін мерекелер өз жалғасын таба бергей. Құрбан айт мерекесі баршамызға мүбәрак болсын! Әмин!
Жарияланған мақалалар мен шет елдік сайттардан алынған аудармалардың авторлық құқығы Azan.kz сайтына тиесілі.
 Предыдущий |
Следующий |
| Харам заттарды сатуға бола ма? / ҚМДБ пәтуасы | Қажылықтағы адам арапа күні ораза ұстай ма? / ҚМДБ пәтуасы |
Тақырып аясындағы мақалалар
Қызықты тақырыптар
Намаз уақыттары 
