"Білекке сенген заманда ешкімге есе бермедік, білімге сенген заманда қапы қалып жүрмелік"
Кел, балалар, оқылық!
Хәкім Абай "Жасымда ғылым бар деп ескермедім» өлеңінде
"Адамның бір қызығы – бала деген,
Баланы оқытуды жек көрмедім.
Баламды медресеге біл деп бердім" - дейді. Медресе дегені – мектеп және басқа да оқу орындары. Құрметті, ата-ана! Бүгін біздің ұл-қыздарымыз мектепке, білімнің даңғыл жолына аттанады. Бүгін білім күні. «Халық пен халықты, адам мен адамды теңестіретін нәрсе – білім» деп ғалым-жазушы Мұхтар Әуезов айтқандай еліміздің дамуы біліммен болмақ.
Құрметті оқушылар! Еліміздің болашағы сіздер. Ағартушы - педагог Ыбырай Алтынсарин:
"Бір Аллаға сиынып,
Кел, балалар, оқылық,
Оқығанды көңілге,
Ықыласпен тоқылық.
Істің болар қайыры
Бастасаңыз Аллалап.
Оқымаған жүреді
Қараңғыны қармалап" - деп жырлағандай мектеп қабырғасында білім нәрімен сусындаңыз. Сізде күш-қуат пен жігер бар. Әліппеден бастап әдебиет, математика, тарих, физика барлық пәнді сүйіп оқыңыз. Білім ғажайып әлем. Өмірдегі сара жолыңды мектеп қабырғасында таңдайсың. Біліммен қатар тағы бір маңызды дүние бар. Ол – тәрбие. Білім мен тәрбие егіз.
Ислам ғалымы Малик бин Динар (р.а.): " Адамның оқыған білімі оғаш мінезін түземесе, ол білімі еш пайдасын тигізбейді" деп айтқан екен. Білім мен тәрбие құстың қос қанаты сияқты. Бір қанатты құс ұша алмайтыны белгілі. Тәрбие жоқ жерде білім пайдасыз. Осы ойды ұлт ұстазы А. Байтұрсынұлы: "Жастардың оқу-тәрбие жұмысы түзелмей, жұрт ісі түзелмейді" деп жеткізеді.
Сондықтан, үздік оқумен қатар әдепті де болмақ керек. Әдепті бала –арлы бала. Әдеп – жақсы тәрбиенің белгісі. Оқушының әдебі мұғалімдерді құрметтеуі, сыныптас достарымен тату болуы. Тіпті кітаптарын ұқыпты ұстауы да әдептілік. Суфиян бин Уйайнә (р.а.): "Білімнің басы – дұрыс құлақ асу, сосын көңілге тоқу. Мұнан кейін жаттау. Сосын - білгенге амал ету. Кейін, білімін бөлісу" деген екен.
Қазақтың данагөй ханы Абылай хан: "Білекке сенген заманда ешкімге есе бермедік, білімге сенген заманда қапы қалып жүрмелік" - деп айтқан екен. Әлемнің екінші ұстазы деп танитын ғұлама Әл-Фараби де біздің бабамыз. Бүгінгі сіздердің ыждаһатпен білім алуларыңыз отанымыздың дамуына қосар үлкен үлес. Ұлттық жазудың реформаторы, ағартушы, мемлекет қайраткері Ахмет Байтұрсынұлы: "Білім – бір құрал. Білімі көп адам құралы сай ұста сықылды, не істесе де келістіріп істейді" -дейді. Расында, білімді терең меңгерген сіздердің араңыздан білікті дәрігер, мұғалім, құрылысшы, инженер, ғалымдар шығады. Ал, білімді болмақ үшін мұғалімді, ұстаздарды құрметтеу әрі әр сабағын бар ықыласпен оқу қажет. Себебі «Ұстазы мықтының – ұстанымы мықты» деген сөз бар.
Ғалымдар: "Ұстазыңды құрметте! Оның мәжілісінде (сыныпта) салмақты бол. Сөздеріне мұқият құлақ сал. Бар болмысыңмен тыңда. Оның алдында дауысыңды көтерме. Сыныпта рұқсатсыз ешкіммен сөйлеспе. Мұғаліміңе біреу тіл тигізсе қорға. Ұстазыңның жақсы қасиеттерін айтып жүр. Мұғалімді сыйлайтын кісілерге құрмет көрсет. Осылай етсең аспандағы періштелер "сен білімді көзбояушылықпен емес ықыласпен үйрендің" деп куәлік етеді" деген екен.
Мұғалімнің еңбегі өте ауыр. Сіздер мұны түсінесіздер. "Ұстаздық еткен жалықпас үйретуден балаға " дегендей жақсы мұғалімнің үш қасиеті бар: "Сабырлық, кішіпейілділік және көркем мінез". Жақсы оқушының да үш қасиеті болуы керек: "Ақыл, әдеп және мұғалімге құлақ сала білу"
Ағартушы, ақын Сұлтанмахмұт Торайғыров «Шәкірт ойы» өлеңінде:
"Қараңғы қазақ көгіне,
Өрмелеп шығып, күн болам!
Қараңғылықтың көгіне,
Күн болмағанда, кім болам?" - деп білім жолындағы оқушының асыл мақсатын көрсетеді. Осы жолда жаңа оқу жылына қадам басып отырған білім алушы оқушыларымызға, шәкірттерімізге сәттілік тілеймін!
Алматы қаласының Бас имамы Төлеби қажы Оспан
Қызықты тақырыптар
Намаз уақыттары 
