КӘСІПКЕРЛЕР ИМАМ-ҰСТАЗДАРҒА КӨЛІК СЫЙЛАДЫ (ФОТО)
Алматыда «Қош бол, Рамазан!» деген атпен игі жақсылардың басын қосқан ауызашар өткізіліп, бір ай бойы ораза тұтып, тарауихта бас қосқан бір топ кәсіпкер асыл дініміздің жолында қызмет етуші имам-ұстаздарға ерекше құрмет көрсетті.
Игі шара Рәтбек қажы Нысанбайұлының қасиетті Құран аяттарын оқумен басталды. Наиб мүфти Кенжеәлі қажы Қоңыратбайұлы Бас мүфти Наурызбай қажы Тағанұлының сәлемін жеткізіп, еліміздегі дін саласындағы даму жайлы сөз қозғады. Ал «Қош бол, Рамазан!» шарасының өзіндік ерекшелігіне тоқталған Алматы қаласының бас имамы Төлеби Оспан: «Бүгін Алматы қаласынан ғана емес, өзге өңірлерден де кәсіпкерлер келіп, бірнеше жанға тосынсый жасауда. Адамға қуаныш сыйлау Пайғамбарымыз (оған Алланың салауаты мен сәлемі болсын) сүннеті, үлкен азаматтық іс. Игі шараға мұрындық болып 30 шақты кәсіпкерді жұмылдырушы «Bayman group Qazaqstan» ЖШС басшысы Сман Бекарыс бастаған азаматтарға Алла разы болғай. Көлік мінген 5 имам-ұстаз болғанымен, оның артында қаншама адам қуанышқа кенелуде»,- деп, әрбір жомарттың табысына игілік тіледі. Жалғасын тапқан жақсылықтың сауабы оның бастауындағыларға бұйыратынын айта келе, мешіт қызметкерлері тарапынан зекет алуға лайықты, қолдауға мұқтаж ұстаздар таңдалғанын атап өтті. Олар:
- Асанбаев Қайыржан - Алматы облысы, Іле ауданы, «Жаңа арна» ауылдық мешітінің имамы (Еңбек өтілі 17 жыл, 6 баласымен қызметтік үйде тұрады);
- Беренқұлов Тұрар - Алматы қаласы, Наурызбай ауданында орналасқан «Кулиза ана» мешітінің имамы. 3 баласы бар. 23 жылдан бері имамдық қызмет атқарады. Қазіргі таңда отбасымен бірге мешіттің қызметтік үйінде тұрады.
- Назаров Әбубакир - «Әбу Ханифа» медресесінде 2016 жылдан бері жұмыс жасап келеді. Қазіргі уақытта жұмыс өтілі 7 жыл.Әбу Ханифа атындағы медресе ұстазы (7 жыл еңбек өтілі);
- Стамбакиев Нұржан - «Нұр-Мүбарак» университетінің оқытушысы, докторант, жас ғалым, бірнеше зерттеу еңбектерінің авторы;
- Қайрат Құрманбаев - «Нұр-Мүбарак» университетінің проректоры, PhD доктор, ҚР Дінтанушылар конгресінің төрағасы, ҚМДБ Ғұламалар кеңесінің мүшесі. Осы арада Қайрат Құрманбаев өз көлігін университет құрылысымен айналысушы «Білім-Қазына» қоғамдық қорына табыстады.
Бұл игі шарада бесінші көлікке қаржы жинау ауызашарға келген қонақтарға да нәсіп болды. Сман әулетінің анасы Азиза Қолдасова бастаған бір топ аналар да қаржыларын қосып, ізгілікке үлес қосты. Ал ұйымдастырушы Бекарыс Абайұлы бұл бастама болашақта 100 көлікке дейін жетуіне тілектестік білдірді.
Алматы Орталық мешітінің баспасөз қызметі
Тақырып бойынша жаңалықтар
Қызықты тақырыптар
Намаз уақыттары 
