РАМАЗАН 2023: АЛМАТЫДА БАСПАСӨЗ МӘСЛИХАТЫ ӨТТІ
Бүгін ҚМДБ наиб мүфтиі Кенжеәлі қажы Қоңыратбайұлы мен Алматы қаласының бас имамы Төлеби Дәділұлы Орталық коммуникациялар қызметінде тікелей эфирде өткен «Ізгілік айы Рамазан» тақырыбында баспасөз мәслихатына қатысып, БАҚ өкілдерінің сұрақтарына жауап берді.
Баспасөз мәслихатында наиб мүфти Кенжеәлі қажы Қоңыратбайұлы Алматы қаласының тұрғындарын қасиетті Рамазанның басталауымен құттықтап, Бас мүфти наурызбай қажы тағанұлының сәлемін жеткізді. «Бас мүфти Наурызбай қажы Тағанұлы 14 наурызда БАҚ өкілдерінің қатысуымен баспасөз мәслихатын өткізді. Аталмыш баспасөз мәслихатында биыл Рамазан айы 23 наурызда басталып, 21 сәуірде аяқталатындығы жариялаған болатын. Сәуірдің 17-нен 18-не қараған түн – Қадір түні. 21 сәуір – ораза айт мерекесі. Биыл пітір садақа мөлшері – 535 теңге болып бекітілді» деді наиб мүфти Кенжеәлі қажы Қоңыратбайұлы.
Сонымен қатар шаһардың бас имамы Төлеби Дәділұлы ізігілік айында қала мешіттерінде атқарылатын шаралар жайлы атап өтті. Алматы мешіттерінде қасиетті Рамазан айын атап өту үшін арнайы бекітілгенін жоспар негізіндегі іс-шараларға тоқталды. Биыл қаладағы 54 мешіттің 50-інде тарауих намазында құран хатым түсіріледі. Қалған 4 мешітте, атап айтсақ:
1. Медеу ауданы «Исмихан» мешіті
2. Наурызбай ауданы «Күлиза ана» мешіті
3. Түрксіб ауданы «Макка» мешіті
4. Түрксіб ауданы «Ар-Рахим» мешітінде тарауих намазы құран хатымсыз оқылады.
Алматы орталық мешітінде «Рамазан шатыры» құрылып, күнделікті 500 кісіге ауызашар дастарханы жайылмақ. Сондай-ақ, қала мешіттерінде де ауызашар берілетінін жеткізді
Ақпараттық-насихат жұмыстары
Жуырда Президент Қасым-Жомарт Тоқаев еліміздің дамуын айқындайтын жиында дін мәселесін көтеріп: «Халқымыздың дүниетанымына сай дәстүрлі исламды дәріптеу аса маңызды. Оның ғылыми-теориялық негізін дамыту қажет», - деп атап өткен болатын. Осыған орай, қасиетті рамазан айында мешіттерде дәстүрлі ислам құндылықтарын дәріптеуге арналған дәрістер, ақпараттық түсіндіру жұмыстары жүргізілмек.
Биылғы жылды ҚМДБ «Ислам және Ізгі қоғам» жылы деп жариялағандықтан ораза айында «Рамазан – ізгілік айы» аясында түрлі шаралар ұйымдастырылмақ.
Сондай-ақ, Алматы тұрғындары арасында «Жарапазан-Party» байқауын жарияладық. Мақсат – ораза айында дін мен дәстүрдің сабақтастығын дәріптеп, кенжелеп қалған дәстүрімізді жаңғырту болып табылады.
Оразаның алғашқы күндері қала мешіттерінде «Оразаға қатысты сауалдарға жауап беру алаңы» деген атпен жамағаттың діни сұрақтарына жауап беру шарасы өткізіледі. Алматы өкілдігі «Оразаға қатысты 200 сұрақ» атты кітапшаны «Muftyat» баспасынан шығарып, мешіттерде 10 000 тиражбен және 20 000 тиражбен ораза кестесі тегін таратылмақ.
Алматы өкілдігіне қарасты «azan.kz» сайтына бір күнде 20 мыңнан астам оқырман кіреді. Ал, Рамазан айында оразаға қатысты мәлімет іздеушілер саны 50 мыңнан асып жығылады. Сайтқа бір мезетте кірушілердің көптігінен сайт жұмысы тоқтап қалатын кездері де болады. Сол себепті, «azan.kz/ kz/ramadan» парақшасын қазақ-орыс тілдерінде қосымша ұсынылып отыр.
Қайырымдылық шаралары
Рамазан – қайырымдылық айы. Жақсылықтар еселенетін ай. Алла Елшісі (с.ғ.с.) бір өсиетінде: «Садақаның абзалы – Рамазан айында берілген садақа», - деп сүйіншілейді. Алматы мешіттерінде ораза айында «Шарапатты Рамазан», «Рамазан қоржыны», «Рамазан тәбәрігі» сынды ауқымды қайырымдылық іс-шараларды ұйымдастыру жоспарлануда. Сонымен қатар «Ел үлесі пәтерге» жобасын жүзеге асыру да қолға алынбақ.
Call орталық
Оразаға, жалпы діни мәселеге қатысты қандай да сұрақтар болса Қазақстан мұсылмандары діни басқармасы жанынан ашылған Діни ақпарат беру орталығынан жауап алуға болатындығын хабарлаймыз. Орталық нөмірі – 8 (7172) 33-30-30. Сондай-ақ, Алматы орталық мешітіне қарасты орталық нөмері – 8 700 719 76 22..
«Рақым айы – Рамазан құтты болсын! Қасиетті айда ұстаған оразамыз, жасаған дұға-тілектеріміз, құлшылық-ғибадаттарымыз, әрбір қайырлы амалдарымыз қабыл болғай! Алла Тағала отбасымызға амандық, жұмысымызға береке-бірлік нәсіп еткей! Тәуелсіздігіміз баянды, еліміз аман, жұртымыз тыныш болғай! Әумин!» деді бас имам Төлеби Оспан.
Алматы Орталық мешітінің баспасөз қызметі
Қызықты тақырыптар
Намаз уақыттары 
