КЕМЕЛ ИМАННЫҢ БІР БЕЛГІСІ...
Ізгілікке үндейтін хақ дін - Исламдағы кемел иман мұсылман адамның көркем мінезді болуына негізделген. Көркем мінезді жан әрдайым өзіне де, айналасына да ізгі ниетте болады. Өзіне қалаған жақсылық пен берекені еш қызғанышсыз дін бауырына да қалайтын шынайы иман иесін діни кемелдікке қол жеткізді деп айта аламыз.
Өзгенің бақытын көре алмау, байлығын қызғану, Алла нәсіп еткен ризық-несібесіне көз аларту иманды адамға тән емес кесірлі қасиет. Жүрегінде берік сенім орнаған адам әркімнің өзіне ғана белгілі уақытта, ерте-кешсіз, белгілі мөлшерде, артық-кемсіз келетін ырыздығы барына шүбәсіз сенеді. Хадис ғалымы Әбу Дәуіт өз еңбегіне қатысты айтқан бір сөзінде: "Ақылды адамға мына хадис жеткілікті: "Кімде-кім өзіне қалағанды мұсылман бауырына қаламайынша толық иман еткен болмайды", - деген.
Адам баласының табиғаты әрдайым өзгенің тарапынан бөлінетін жылулықты, мейірімділікті, қамқорлықты қажет етеді. Ал сізге дін бауырыңыз риясыз көңілмен шынайы дұға жасап, өзіне тілегенді сізге екі есе дәрежеде тілесе қандай мәрттік. Бұндай иманы кемел жомарт жанның қасынан табылудың өзі бір ғанибет. Сіздің амандығыңызды бір кісідей тілейтін адамның бар екенін білудің өзі көңілге жылулық ұялатады. Адамдар арасындағы осындай бір-біріне деген бауырмалдық, мейірім қоғамды жарқын жаққа өзгертетіні сөзсіз. Қасиетті Құрандағы "Әнфәл" сүресінің 63-аятында "Алла сол мүміндердің жүректерін жарастырды (һәм оларды саған мызғымас қорған қылды). Егер сен жер бетіндегі байлықтың барлығын осы жолда жұмсасаң дағы, олардың жүректерін дәл бұлай жарастыра алмас едің. Алайда Алла оларды жарастырды. Шүбәсіз Ол бәрінен үстем әрі ұлық және әр ісі мен әр үкімінде талай хикмет болған асқан даналық иесі.", - деп келуі, адамның күні адаммен екеніне тағы бір мәрте көз жеткізеді. Ал "Хужурат" сүресінің 10-аятында: "Шын мәнінде мүміндер бауыр", - делінген. Нұғман ибн Башир (р.а) риуаятында Пайғамбарымыз (оған Алланың салауаты мен сәлемі болсын) «Мұсылмандар бір-біріне бауырмалдықта, мейірімділікте, қарым-қатынаста бір бүтін дене іспеттес. Егер оның бір ағзасы ауырса, қалғаны ұйқысыз және ыстығы көтерілуінде онымен бірге болады» — деген.
Адам өз бауырына қандай мәміледе бола алады? Бауыр деген ең жақын, ең қымбат адам. Дін бауырдың да орны ерекше. Демек, өзіңе қалағанды ең жақын бауырыңа да тілеу, тіпті, өзіңде жоқты соған тілеу мұсылманның иман дәрежесінің биіктігін паш етеді.
Алмалы аудандық “Төле би” мешітінің ұстазы
Көптілеуов Бауыржан
Жарияланған мақалалар мен шет елдік сайттардан алынған аудармалардың авторлық құқығы Azan.kz сайтына тиесілі.
 Предыдущий |
Следующий |
| КӨРШІ АҚЫСЫ - ҚҰДАЙ АҚЫСЫ | ЕЛ ІШІ АЛТЫН БЕСІК |
Қызықты тақырыптар
Намаз уақыттары 
