ШЫНАЙЫ МҰСЫЛМАННЫҢ КЕЛБЕТІ
Асыл дініміз исламның мақсаты ол Алланың ең қадірлі жаратылысы болып табылатын адамды кемелдендіру болмақ. Расында мұсылман деген сөз ол ең құнды сөз, ал мағынасы «бойұсынушы» дегенді білдіреді.
Себебі Алла Тағала қасиетті Құрандағы бұйрықтары адамды жақсылыққа жетелейді. Исламның бес парызының мақсаты адамды кемелдендіруге негізделген. Исламның бес парызының бірі болған намаз құлшылығы жайында Алла Тағала қасиетті Құранда: «Расында, намаз арсыздықтан және жамандықтан тыяды» деген [1]. Сонда намаздың өзі адамды шынайы мұсылман болуына және мінезінің кемелденуіне көмек көрсетер құлшылық.
Сондай-ақ, шынайы мұсылманның қандай болуын көрсеткен тұлға ол Алланың ең сүйіктісі һәм пайғамбарлардың соңғысы Мұхаммед (оған Алланың салауаты мен сәлемі болсын). Ол өзінің өмірінде мұсылманның Алласымен және ата-анасымен және бауырлары һәм туыстарымен, тіпті мұсылман емес өзге дін өкілдерімен жақсы қарым- қатынас жасап шынайы мұсылманның келбеті қандай болуы керетігін көрсетті.
Шынайы мұсылман қандай болуы керек деген сұраққа пайғамбар хадисінде былай баян етіледі: «Нағыз мұсылман - өзге адамдар оның тілі мен қолынан зиян көрмеген адам», - деген [2]. Сондықтан өзін шынайы мұсылманмын деген адам басқа адамдарға, жалпы қоғамға зиянын тигізбеуі керек.
Мұсылманның шынайы қандай болуын Пайғамбарымыз (оған Алланың салауаты мен сәлемі болсын) өзінің хадистерінде "сендердің ең жақсыларың" деп көрсетіп, былай деп сыйпаттаған:
- «Сендердің ең жақсыларың - Құранды үйреніп, оны үйреткендерің» [3];
- «Сендердің ең жақсыларың - мінезі көркем болғандарың» [4];
- «Сендердің ең жақсыларың - қарызды көркем түрде қайтарғандарың» [5];
- «Сендердің ең жақсыларың - әйелдеріне жақсы қарағандарың» [6]
- «Сендердің ең жақсыларың - өзгелерге пайдалы болғандарың» [7]
- «Сендердің ең жақсыларың - көршілерімен жақсы болғандарың» [9];
- «Сендердің ең жақсыларың - мұқтажды тамақтандаратын әрі сәлем бергенде жауап беретіндерің» [8];
- «Сендердің ең жақсыларың - ұзақ өмір сүріп, сол уақытын жақсылық жасауға арнағандарың» [10];
- «Сендердің ең жақсыларың - жүрегі таза болғандарың және өтірік айтпағандарың» [11], - деп сипаттаған.
Хакім Абай атамыз өлеңдерінің бірінде:
«Алла мінсіз, әуелден пайғамбар хақ
Мүмін болсаң сен де ұқсап бақ» деп пайғамбарға ұқсауға һәм шынайы мұсылман болуға шақырған.
Қорыта айтарымыз, Бұхар жырау бабамыз «дін мұсылман болмаса, тіл мұсылман не пайда?» деп шынайы мұсылманның келбеті тілінде емес өмірінде, қоршаған ортасында және адамдармен қарым-қатынасында бой көрсетуі керектін көрсетеді.
Алла Тағала Пайғамбарымыз (оған Алланың салауаты мен сәлемі болсын) сипаттаған ең жақсылардан болып, шынайы мұсылманның келбетін көрсетуімізді нәсіп етсін.
Алматы қаласы, Бостандық ауданы,
«Нұрлытау» мешітінің бас имамы
Пернебекұлы Темірбек
Пайдаланылған әдебиеттер тізімі:
- «Анкабут сүресі» сүресі, 45-аят
- Мүслим
- Бұхари
- Бұхари
- Бұхари
- Бұхари
- Табарани
- Термизи
- Сахих әл-Жамиғ
- Сахих әл-Жамиғ
- Сахих әл-Жамиғ
Жарияланған мақалалар мен шет елдік сайттардан алынған аудармалардың авторлық құқығы Azan.kz сайтына тиесілі.
 Предыдущий |
Следующий |
| МҰХАММЕД ПАЙҒАМБАР ИСЛАМДЫ ҚАЛАЙ СИПАТТАҒАН? | ПАЙҒАМБАРҒА ҚАТЫСТЫ 9 ӘДЕП |
Қызықты тақырыптар
Намаз уақыттары 
