АЛМАТЫ: «АНАЛАР АМАНАТЫ» ЖИЫНЫ ӨТТІ
Бүгін Қазақстан мұсылмандары діни басқармасы Алматы қаласы өкілдігі бойынша «Әйел-қыздар» секторының ұйымдастыруымен шаһардың ардақты аналары мен аяулы әжелері жиын өткізді.
Келелі бас қосуды Алматы Орталық мешітінің наиб имамы Бекзат Сыздықов ашып, әжелер қауымына игі бастамаға сәттілік тіледі. Жиналған аналар мен әжелер дін мен дәстүр жолында «Әжелер мектебін» құрып, өскелең ұрпаққа аналардан қалған аманатты жеткізуді көздейді. «Рухани жаңғыру жолындағы Жаңа Қазақстанның ұлттық болмысын жаңғыртуға үлес қосу біздің үлкен міндетіміз», - деген алматылық әжелер тобы қаланың әр ауданында игілікті шара жалғасын тауып, үлес қосуға ниетті екенін жеткізді. Ұйымдастырушы ҚМДБ Алматы қаласы өкілдігі бойынша «Әйел-қыздар» секторының меңгерушісі Гүлмира Ілесбайқызы: «Құрылып отырған «Әжелер мектебі» алдағы уақытта ұмытылып бара жатқан салт-дәстүр негізінде семинар, шеберлік сағаттарын тұрақты түрде өткізуді қолға алуды жоспарлауда. Бұл өз кезегінде жас қыздарымыз бен жаңа түскен келіндерге дұрыс бағыт-бағдар беріп, дәстүрлі ислам діні мен әдет-ғұрыптарымыз арқылы тәрбиелеудің бір көзі болмақ. Аналар аманатын өскелең ұрпаққа жеткізу парызымыз деп білетін алматылық әжелер қауымын осы іс-шараларға қатысып, белсенділік танытуға шақырамыз», - деп, бүгінгі бас қосуға келген ардақты аналар мен аяулы әжелерге алғысын білдірді.
Алматы Орталық мешітінің баспасөз қызметі
Қызықты тақырыптар
Намаз уақыттары 
