"АҚ БАТА" САЙЫСЫ ҚОРЫТЫНДЫЛАНДЫ
Алматы қаласының бас имамы Төлеби Дәділұлының бастамасымен өкілдікке қарасты 8 аудан мен қала мешіттерінің ақсақалдары арасында бата беруден сайыс ұйымдастырылған болатын.
Онлайн түрде өткізілген бата беру сайысы Алматы Орталық мешітінде қасиетті жұма қарсаңында қорытындыланды. Әділ-қазылар сайысқа қатысқан 22 ақсақалдың батасын тыңдап, батаның мазмұны, орындау шеберлігі, жатқа айтуы мен қазақы киім үлгісі бойынша критерийлері негізінде бағаланды. Үздік үштік анықталып, наиб мүфти Кенжеәлі қажы Қоңыратбайұлы қаржылай сыйлық және алғыс хатпен марапаттады. Атап айтсақ, І орын Құрбанәлі Абдыхайымұлы (Алатау ауданы) - 100 000 теңге, ІІ орын Жайсаңбай Қаңтарбаев (Әуезов ауданы) 70 000 теңге, ІІІ орын Берік қажы Әдиев (Медеу ауданы) - 50 000 теңге бұйырды. Ал қалған 19 ақсақалға ынталандыру ретінде қаржылай 10 000 теңге және барлық қатысушыға мүфтият баспасынан шыққан кітаптар жиынтығы салынған қорапша мен бас имам атынан алғыс хат табысталды. "Сан ғасырлар бойы ислам дінін ұстанған қазақ халқының рухани өміріндегі бата беру дәстүрін жалғастыру мақсатында Алматы Орталық мешітінің ұйымдастыруымен өткен «Ақ бата» сайысына қатысып, белсенділік танытқаныңыз үшін алғыс білдіремін. Алла Тағала рухани өмірде тұтастық пен бірлік, салт-дәстүрді жаңғыртуда жақсылықтың жаршысы болуды жазғай. Деніңізге саулық және өміріңізге береке тілеймін" делінген алғыс хатта.
Алматы Орталық мешітінің баспасөз қызметі
Қызықты тақырыптар
Намаз уақыттары 
