ҚМДБ АЛМАТЫДА АУЫЗАШАР ӨТКІЗДІ
Бас мүфти Наурызбай қажы Тағанұлы Қазақстан мұсылмандары діни басқармасының атынан оңтүстік астана Алматы жұртшылығына арнап ауызашар өткізді
«Рамазан – ізгілік бастауы» атымен ұйымдастырылған шара Алматы қаласының бас имамы Төлеби Дәділұлының Құран оқуымен басталса, ҚМДБ Төрағасы, Наурызбай қажы Тағанұлы өмірден өткен марқұмдардың рухына дұға бағыштады.
Зиялы қауым өкілдері, қарттар үйінің тұрғындары ақсақалдар мен ақ жаулықты әжелер, өнер мен мәдениет қайраткерлері, сондай-ақ балалар үйінің тәрбиеленушілері қонақ болған ауызашар дастарқанында Бас мүфти жамағатқа ізгі тілегін білдіріп, қасиетті Рамазан айымен құттықтады.
«Рамазан айындағы құлшылық-ғибадаттарыңызды, дұға-тілектеріңіз қабыл болсын! Баршаңызды күллі мұсылман баласы асыға күтетін қасиетті Рамазан айымен шын жүректен құттықтаймын! Әр шаңыраққа бақыт пен береке, мықты денсаулық тілеймін!
Рамазан – тәрбие мен тағылым айы. Қасиетті айда мұсылман баласы қанағат, шүкір, мейірім, бауырмалдық, кешірім сынды көркем мінезді қалыптастыруға тырысады. Өйткені, қасиетті айда мұсылманға көп жақсылық пен мүмкіндіктер беріледі. Бұл туралы ардақты Пайғамбарымыз Мұхаммед (оған Алланың салауаты мен сәлемі болсын): «Бұл айда жәннат есіктері ашылады. Ораза тұтқан адамның алдыңғы және кейінгі күнәлары кешіріледі», – деген сүйінші хабар жеткізген.
Ендеше, берекелі айда көбірек сауапты амал жасауға асығайық. Ата-анамыздың, қазыналы қарттарымыздың дұғасы мен алғысын алуға тырысайық. Мүмкіндікке қарай мұқтаж жандарға қол ұшын беріп, науқастың көңілін сұрап, сауап алайық» деді ҚМДБ Төрағасы.
Өз кезегінде құттықтау сөз кезегін алған ақсақалдар мен зиялы қауым өкілдері Бас мүфтиге алғыс білдіріп, Діни басқарманың игі бастамаларына сәттілік тіледі.
Ауызашар дастарқанында термелер орындалып, жас таланттардан құралған бір топ жігіттер заманауи дәстүр үрдісімен жарапазан жырын айтты.
Сонымен қатар Бас мүфти Наурызбай қажы Тағанұлы ақсақалдар мен ақ жаулықты аналарға және балаларға арнайы рамазан сыйын табыстады.
Алматы Орталық мешітінің баспасөз қызметі
Қызықты тақырыптар
Намаз уақыттары 
