ҚҰРБАН АЙТ - 2022: АЛМАТЫДА 5501 ОТБАСЫНА 34 ТОННАДАН АСА ЕТ ТАРАТЫЛДЫ
Күллі мұсылман қауымы аңсай күткен ұлық мереке – Құрбан айттың үшінші күні де аяқталды.
Биылғы Құрбан айт ҚМДБ Төрағасы, Бас мүфти Наурызбай қажы Тағанұлы хазреттің бастамасымен 9-11 шілдеге күндері онлайн және офлайн түрде өтті. Алматы қаласындағы 53 мешітте таңғы сағат 06:30-да айт намазы оқылып, қала әкімдігі бекіткен 13 орында құрбандық шалынды. Бұдан өзге қала мешіттерінің барлығында ет қабылдау пункттері қызмет етті. Сонымен қатар онлайн түрде «qurban2022.kz» сайты арқылы тапсырыс қабылданды.
Алматы қаласы өкілдігі бойынша онлайн және офлайн түрінде 1586 ұсақ мал (1474 қой, 112 ешкі), 34 ірі қара (сиыр) құрбандыққа шалынды. Оның ішінде 19 мекемеге құрбандық еті таратылып, көмек көрсетілді. Одан өзге қала мешіттеріне тұрғындар тарапынан 4 тоннаға жуық ет әкелініп, қабылдау пункттеріне өткізілді. Жалпы алғанда Алматы өкілдігінде 5501 отбасына 34 тоннадан астам ет үлестірілді. Бұл көрсеткіш өткен жылмен салыстырғанда 17,6%-ға жоғары.
Құранда «Хаж» сүресінің 28-аятында: «Құрбанның етінен өздерің жеңдер, әрі міскіндер мен кедейлерге жегізіңдер», - делінген. Құрбандыққа шалған малдың етінен өзі алып, өзгелерге таратқан барша мұсылман қауымының құрбандықтары қабыл болсын! Мұқтаж жандардың көңілдеріне қуаныш сыйлауға үлес қосқан жергілікті билік пен Алматы қаласы мешіттерінің діни қызметкерлері мен еріктілер тобына, жанашыр жамағат пен жомарт жандарға құрбандық етін алған отбасылар үлкен алғыс білдірді.
.jpg)
Алла Тағала ізгі ниетпен шалған құрбандықтарыңыз бен дұға-тілектеріңізді қабыл етсін!
Алматы Орталық мешітінің баспасөз қызметі
Қызықты тақырыптар
Намаз уақыттары 
