БАҚЫТТЫ ОТБАСЫН ҚҰРУ КЕМЕЛДІККЕ БАСТАР ЖОЛ
Отбасының сәні – сыйластық демекші бақытты отбасын құрудың құпиясы неде? Оны қайдан іздемек керек? Әрине, шаңырақты ақ некемен бастайтын ерлі-зайыптылар отбасылық өмірдегі барлық сұрақтарына жауапты асыл дінімізден іздейді. Ендеше, Құран Кәрім қандай бағыт береді?
Құран Кәрімде: «Сондай-ақ Оның (шексіз құдіретін көрсететін) айқын дәлелдерінің бірі – оларға жандары жай тапсын деп, сендер үшін өз болмыстарыңнан жұбайлар жаратып, араларыңа сүйіспеншілік пен мейірім сезімін ұялатқандығы. Міне, осының өзінде ақылға салып ойланатын қауым үшін ап-айқын дәлелдер мен талай ғибрат бар» деген. Аятта екі басты мақсат баян етілуде. Біріншісі, шаңырақ көтергенде не табатындығына жауап берілуде. Аяттағы «жаны жай тапсын» дегені үйленумен екі жарты, бір бүтін болып жан тыныштығын табу айтылуда. Екіншісі, жұбайларға ортақ етіліп екі сый беріледі. Ол – сүйіспеншілік пен мейірім сезімі. Осы екі сезімді жұбайлар дұрыс пайдалана алса, отбасылық кез келген мәселені шешуді үйренеді.
Отбасы – қоғамды қалыптастыратын негіз, оның іргетасы. Отбасы ішіндегі қарым-қатынас қоғамға оң немесе теріс ықпалы болады. Құндылықтарды қастерлейтін отбасы қоғамның салауаттылығына тұтастай жағымды әсер етеді. Сондықтан да қоғамның іргетасын бұзбай сақтаудың жолы отбасы құндылықтарына мән беру. Шаңырақ көтеретін жастарға осы қағидаттар насихатталуы тиіс. Жұбайлардың әрбірі өзінің жауапкершілігін сезінуі керек. Ал, жауапкершілікке қатысты Ардақты пайғамбарымыз (оған Алланың салауаты мен сәлемі болсын) не деген? Хадисте: «Сендердің әрбірің өз қарамағындағыларға жауапты. Басшы халқына жауапты. Ер азамат отбасына жауапты. Әйел күйеуінің шаңырағына жауапты...» деген. Ерлі-зайыптылардың әрқайсысы өзінің құқығын білгені сияқты, міндетін де мүлтіксіз орындау керектігін де түсінгені жөн. Жоғарыдағы хадис соны үйретуде.
Әйел – аманат екенін ер азамат ұмытпауы қажет. Неке қиюмен, Алла сөзімен алған аманаты. Шариғат еркекті шаңырақ иесі етуі әйеліне және бала-шағасына қамқор болуы үшін берілген құқық. Еркектің міндеті бала-шағаны асырау ғана емес. Сонымен қатар қамқорлығын көрсетуі, жылулығын сыйлауы. Пайғамбарымыз (оған Алланың салауаты мен сәлемі болсын) қоштасу қажылығында: «Әйелдерге жақсы қараңдар. Өйткені, олар сендерге тәуелді...» деген.
Үй ішінде жайма-шуақ атмосфера сақталып, шаңырақ шаттығы ұзағынан болуы үшін отағасы әрдайым даналықпен, ақыл және мейіріммен қарым-қатынас жасағаны жөн. Сонымен қатар, әйелінің кейбір кемшіліктерін байқамағаны дұрыс. Болмашы ұсақ-түйек дүние үшін жазғыру, кінәлау деген әрекеттер шаңырақтың шырқын кетіретіні белгілі. Қала берсе әйел заты сезім адамы екенін ұмытпағаны жөн. Міне, сондықтан да Пайғамбарымыз (оған Алланың салауаты мен сәлемі болсын): «Мұсылман кісі әйелін жазғырмасын. Әйелінің бір мінезін жақтырмаса, басқа бір мінезі көңілінен шығады » деген.
"Төле би" мешітінің наиб имамы
Ербол Абдуахитұлы
Жарияланған мақалалар мен шет елдік сайттардан алынған аудармалардың авторлық құқығы Azan.kz сайтына тиесілі.
 Предыдущий |
Следующий |
| БІЛІКТІ ИМАМ - ҚОҒАМ АЙНАСЫ | ІБІЛІСТІ МАЛҒҰН ЕТКЕН - ТӘКАППАРЛЫҚ |
Қызықты тақырыптар
Намаз уақыттары 
