«МЕКТЕПКЕ ЖОЛ»: Әл-Азим мешіті 18 балаға смарт-ұялы телефонын сыйлады
Алматы қаласы, Алатау ауданы «Әл-Азим» мешіті және аталмыш мешіт жанындағы «Ұмтылыс» ерікті жастар бірлестігінің жылдағы дәстүрлі қайырымдылық шарасы аясында әлеуметтік аз қамтылған отбасы балаларын жаңа оқу маусымына даярлау мақсатында 18 оқушыға соңғы үлгідегі смарт-ұялы телефондары мен 20 оқушыға оқу құралдары салынған арнайы сөмкелер таратылды.
Шараның ашылуында сөз алған «Әл-Азим» мешітінің имамы Ғазиз Жусипов: «Ақиқатында барша мақтау Алланыкі. Құрметті ата-аналар мен оқушылар сіздерге бүгін таратылатын әрбір ұялы телефондар мен қажетті оқу құралдары Алланың сіздерге жіберген ризығы деп қабылдану керек. Егер осы телефондар тек қана білім жолына қолданылып, күнә атаулыдан аулақ ұсталса шүкірлік жасалды деп жазылады. Ал, қасиетті Құранда шүкір етушілерді Раббымыз дәріптеп, оларға деген кеңшілігін әрі қарай кеңейтетінін сүйіншілеген», – деп оқушылардың білім сапарына сәттілік тіледі.
Өз кезегінде ата-аналар да өздерінің ыстық ықыластары мен тілектерін жеткізіп, дәл осындай қиын-қыстау сәтінде көмек беріп отырған мешіт ұжымына және жәрдемшілердің баршасына аналық ақ тілектерін арнап, тіпті көз жастарына ерік бергендері болды.
Жер бетіндегі Алланың үйлері аталған мешіттер қашанда ізгіліктің ошағы екені сөзсіз. Олай болса, мұндай қайырымдылық шаралары жалғасатын болады.
«Әл-Азим» мешітінің баспасөз қызметі
Қызықты тақырыптар
Намаз уақыттары 
