«Салиқалы ұрпақ» қоғамдық қоры 100 қариға білім грантын табыстады (ФОТО)
Алматы орталық мешітінде, «Салиқалы ұрпақ» қоғамдық қорының жастарды қолдауға бағытталған игі шарасы аясында, еліміздің түрлі аймақтарынан келіп білім алып жатқан 100 қариға білім гранты табысталды. Олардың қатарында медресе-колледждерде, Құран кәрім сауат ашу курстарында, сондай-ақ қариларды дайындау орталықтарында білім алып жүрген жас өрендер бар.
Білім грантын табыстау рәсіміне «Салиқалы ұрпақ» қорының директоры Қасым Қасабеков, ҚМДБ Діни білім және кадр даярлау бөлімінің меңгерушісі Смайыл Сейтбеков және Алматы қаласының бас имамы Еркінбек Шоқай қатысты.
Шараны құттықтау сөзбен бастаған Смайл Сейтбеков дініміздегі ілім алу мен қайырымдылықтың маңызына тоқталды. Сондай-ақ, Қасиетті Құранға шексіз құрмет көрсетіп, қариларға қолдау білдірген «Салиқалы ұрпақ» қоғамдық қорына ризашылығын жеткізді.
«Жастарды қолдау «Салиқалы ұрпақ» қорының әр жыл сайынғы ізгі дәстүрінің біріне айналды. Қарилық зор еңбекті талап етеді, осы жолды таңдаған жастарға өз тарапымыздан барынша көмек беруге әзірміз», - деді «Салиқалы ұрпақ» қорының директоры Қасым Қасабеков.
Білім алушылар діни бағыттағы ілімдерін жетілдіруде көп ынталандыру тудырғаны үшін «Салиқалы ұрпақ» қорына алғыс білдірді.
Гранттарды табыстау рәсімі бірнеше қалада кезең-кезеңмен өткізілді.
Қор туралы анықтама:
«Салиқалы ұрпақ» қоғамдық қоры өз қызметін 2016 жылдың сәуір айында бастады. Қор бірнеше бағытта жұмыс атқарады: тұрмысы төмен отбасылардан шыққан балаларды күтіп-бағу және тәрбиелеу, тұрмысы төмен отбасыларға азық-түлік тарату арқылы көмек көрсету; мұқтаж жандардың ем алуына қаражат бөлу; оқу ақысын төлеу; мемлекеттік тілді, ұлттық дәстүрлерді дамыту, мешіттер салу, түрлі деңгейдегі спорттық іс-шаралар өткізу.
Қызықты тақырыптар
Намаз уақыттары 
