«СЫРҒА ТОЛЫ СҮРЕ - КӘҺФ» ӘЖЕЛЕР АРАСЫНДА САЙЫС ӨТТІ
Алмалы ауданына қарасты «Төле би» мешітінде әжелер арасында «Кәһф» сүресін жатқа айту бойынша Құран жарысы болып өтті.
68 жас пен 82 жас арасындағы он қатысушының Құранға деген махаббаты жарысқа тыңғылықты дайындықтарынан көрініп тұрды. «Кәһф» сүресінен даналық іздеген әрбір қарт көрермендердің ыстық ықыласына ие болды. Рухани кеш көрермендері 82 жасты алқалаған жүрегінде Құраны бар әжеге таңданысын жасыра алмады.
Әділ-қазы алқа мүшелері «Қалқаман» мешітінің ұстазы Теміралиева Рәзия, «Төле би» мешітінің ұстазы Оразбаева Раушангүл ұстаздар болды. Төрелік жасаушылар үшін де әжелерге баға беру оңай болған жоқ. Алматы әйел-қыздар секторының меңгерушісі ұстаз Гүлмира Ілесбайқызы бастаған топ барынша әділдіктің туын ұстануға тырысты. Бірі қатысушылардың тәджуид ережелеріне мән берсе, енді бірі ынтасы үшін ыждаһат білдірді. Жарыс барысында «Төле би» мешітінің ұстазы Мәдина ұстаз тақырыпты ашып, көрермендерге «Кәһф» сүресінің сырын, қасиетін ұғындыруға тырысты. Әсерлі уағыз тыңдаушының жүрегін тебірентті.
Жарыс нәтижесі бойынша 1 орын жаттауымен де, ережені сақтауымен де оза шапқан Омарова Ұлту әжейге берілді. 2 орынды Өскенбаева Шәрбану апамыз иеленсе, 3 орын Тасымқызы Зиба әжеге бұйырды. Жеңімпаздарға ақшалай сыйлықтар табысталды. Сондай-ақ, қалған қатысушылар ынталандыру сыйына ие болды. Қиямет күні Алла Тағала Өзінің жанындағы сыйды нәсіп етуін тілейміз!
Жарыс соңы қатысушылар мен көрермендердің тәтті шайына ұласты. Дастархан басында тұшымды әңгіме айтылып, әжелер жарыстан алған әсерлерімен бөлісті. Игі шара Құран хатым дұғасымен аяқталды.
Алматы Орталық мешітінің баспасөз қызметі
Қызықты тақырыптар
Намаз уақыттары 
